भांगरभूंय | प्रतिनिधी
सुभाष शिरोडकार: पडोशें उदका प्रकल्पाक दिली भेट
दिवचल: पावस लांबणेर पडिल्ल्यान उदकाचो प्रस्न निर्माण जावपाची शक्यताय आशिल्ली. ताका लागून अस्नोडें ते पडोशें अशी 14 किलोमिटर पर्यायी उदका वाहिनी दुरुस्त करून पर्यायी वेवस्था तयार केली. पूण आतां पावस पडिल्ल्यान सांखळेतले बंधारे भरल्यात आनी हे खातीर हे वेवस्थेची आतां गरज भासची ना अशें उदका स्रोत मंत्री सुभाष शिरोडकार हांणी सांखळेंत सांगलें.
काल तांणी पडोशें, सांखळे प्रकल्पाक भेट दिवन नियाळ घेतलो. पावस सुरू जाल्ल्यान सगले प्रस्न सुटावे जाल्यात आनी अधिकाऱ्यांक सगले तरेची खबरदारी घेवपाची सुचोवणी दिल्ल्याचें शिरोडकार हांणी सांगलें.
आमी पर्यायी वेवस्था तयार दवरल्या. जी वाहिनी आसा, तातूंत दुरुस्ती आनी सुदारणा करून अस्नोडें ते पडोशें प्रकल्प अशी थेट जोडणी केल्या. पडोशें प्रकल्पांत उदक उणें जाल्लें. ताका लागून ही ताततडीची सोय केली, पूण आतां सगले सुरळीत आशिल्ल्याचें तांणी सांगलें.
उदका स्रोत खात्या वतीन पावसांत वेवस्थापन सारकें दवरचें अशी सुचोवणी केल्या. पावसांत चडसो धोको आशिल्ल्या हुंवारा विशीं अधिकाऱ्यांनी सगली ती खबरदारी घेतल्या. सांखळी व्हाळवाट, दिवचल न्हय, शाळ शापोरा न्हय ह्या सुवातांनी पंपींग आनी सजकताय दवरल्या. पावसांत तिळारी धरणाचें उदक सोटडटना सगली ती खबरदारी घेवप, तिळारी धरण अधिकारी वर्गाच्या संपर्कांत रावप हे विशीं खबरदारी घेतिल्ल्याचें मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
