भांगरभूंय | प्रतिनिधी
पणजी : म्हादय न्हंयेवेल्या कळसा-भांडुरा प्रकल्पाक लागून अस्तंत घांटांतल्या पर्यावरण संवेदनशील भागांत लुकसाण जावपाचें आसा. पाणलोट वाठारांत उणाव निर्माण जावन थळाव्यांचे उपजीविकेचेर परिणाम जातलो, अशी शिटकावणी दित खानापूर म्हालांतल्या शेतकार आनी पर्यावरण मोगींनी हो प्रकल्प फाटीं घेवपाची मागणी केल्या.
हे मागणे विशीं शुक्रारा जिल्लोधिकारी मोहम्मद रोशन हांकां निवेदन सादर केलें. शिवाजी कागणीकर, नितीन धोंड, सुजित मुळगुंद, दिलीप कामत, नागेंद्र प्रभू, शिवलीला मिसाळे हांच्या नेतृत्वा खाला हें निवेदन दिलें.
प्रकल्पाक लागून भीमगड आनी म्हादय अभयारण्याक धोको निर्माण जातलो, अस्तंत घांटांतल्या सूक्ष्म हवामान आनी पर्जन्यमानाचेर वायट परिणाम जावपाचो भंय पर्यावरणतज्ज्ञांनी उक्तायलो. पिवपाच्या उदकाचो प्रस्न गंभीर जावपाची शक्यताय आसा, सुरू आशिल्लीं कामां बेगीनूच आडावचीं, अशें निवेदनांत स्पश्टपणान नमूद केलां. प्रकल्पा खातीर शेतकारांक दिल्ल्यो भूसंपादन नोटिसोय फाटीं घेवच्यो, अशीय मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
