भांगरभूंय | प्रतिनिधी
62 वर्सांतली सगल्यांत चड तापमानाची नोंद
अनुकूल वातावरण नाशिल्ल्यान गोंयांतलो मॉन्सून उणो जाला. पावस नाशिल्ल्यान गोंयांतल्या चडांत चड आनी उण्यांत उणें तापमाना भितर वाड जायत आसा. सोमारा पणजेंत चडांत चड 33.5 अंश सेल्सियस तापमानाची नोंद जाली. हें फाटल्या 62 वर्सांतल्या जुलय म्हयन्यांतलें सगल्यांत चड चडांत चड तापमान थारलां. हवामान खात्यान फुडल्या स दिसांत गोंयांत उण्यां प्रमाणांत पावसाची शक्यताय उक्तायल्या. हाका लागून वताची खरसाण आनीक वाडपाची शक्यताय आसा.
गोंयांत 24 वरांत अंदूंच्या जुलय म्हयन्यांतली सगल्यांत उणी म्हणल्यार फक्त 1.4 मिलिमिटर पावसाची नोंद जाली. गोंयांतल्या 14 पैकीं फक्त 4 केंद्रांत सामको उणो पावस पडलो. 1 जून ते 13 जुलय मजगतीं गोंयांत सरासरी 35.73 इंच पावसाची नोंद जाली. ह्या वळार गोंयांत 52.05 इंच पावसाची नोंद जाता. अंदूं पावसाचें प्रमाण 33 टक्क्यांनी उणें आसा.
गोंयांत 13 ते 18 जुलय मजगतीं चडांत चड तापमान 33 ते 34 अंश जाल्यार उण्यांत उणें तापमान 26 ते 27 अंश सेल्सियस मजगतीं उरपाची शक्यताय आसा.
सोमारा पणजेंत चडांत चड 27.4 सेल्सियस तापमानाची नोंद जाली. मुरगांवां चडांत चड तापमान 32.8 अंश आनी उण्यांत उणें तापमान 27.6 अंश सेल्सियस उरलें.
गोंयांत 1 जून ते 13 जुलय मजगतीं काणकोणां सगल्यांत चड 49.78 इंच पावसाची नोंद जाली. धारबांदोड्यां 43.55 इंच, सांग्यार 40.61 इंच, मडगांवां 39.58 इंच, वाळपय 38.36 इंच, फोंड्यां 37.34 इंच, केप्यां 36.92 इंच, सांखळे 35.37 इंच, पेडण्यांं 32.25 इंच, म्हापश्यां 29.59 इंच, मुरगांवां 30.30 इंच, दाबोळे 29.78 इंच जाल्यार पणजे 25.77 इंच पावसाची नोंद जाली.
———–
बॉक्स
मेळिल्ले म्हायती प्रमाण 13 जुलय अखेरेक गवाणें धरणांत सगल्यांत चड 73 टक्के उदकाचो सांठो शिल्लक आशिल्लो. आमठाणें धरण 67 टक्के भरलां. चापोली धरण 55 टक्के, तिलारी धरण 54 टक्के, साळावली धरण 48 टक्के भरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
