भांगरभूंय | प्रतिनिधी
साळगांवां भाजप आनी काँग्रेस पक्षाच्या भितरल्या राजकारणांचें आव्हान उबें
म्हापशें: साळगांव विधानसभा मतदारसंघाची निर्मिती ही 1989 वर्सा केल्ली. ताचे पयलीं हो मतदारसंघ कळंगूट आनी हळदोणें मतदारसंघांत विभागिल्लो. ह्या मतदारसंघांत सेगीत चार फावटी वेंचून येवपाचो पराक्रम आदले मुख्यमंत्री सर्गेस्त डॉ. विल्फ्रेड डिसौझा हांणी केला. उपरांत दोन फावटी आदले मंत्री दिलीप परुळेकार हांणी जाल्यार एक फावटी आदले मंत्री जयेश साळगांवकार हांणी ह्या मतदारसंघाचे प्रतिनिधित्व केलां. सद्या केदार नायक हे ह्या मतदारसंघाचे सद्याचे आमदार आसात. फाटले फावटी आमदार नायक हे काँग्रेसीचे उमेदवारीचे जैतिवंत जाल्ले. ह्या वेळार दुसरे फावटी वेंचून येवपा खातीर ते यत्न करीत आसात. पूण तांचे मुखार भाजपाच्या आनी काँग्रेसीच्या भितरल्या राजकारणांचें आव्हान उबें आसा.
आमदार केदार नायक हे अंदूं भाजपाचे उमेदवारीचेर वेंचणूक लडोवपाक इत्सूक आसात. फाटले फावटी ऐन वेंचणुकेच्या काळातं आदले मंत्री जयेश साळगांवकार हांकां गोवा फॉरवर्ड पक्षांतल्यान भाजपांत प्रवेश दिवपाच्या निर्णयाक मतदारसंघांतल्या कार्यकर्त्यांनी खर आक्षेप घेतिल्लो आनी पक्षा पसून पयस राविल्ले. भाजपाच्या उमेदवारी खातीर त्या वेळार केदार नायक हे मुखेल दादवेदार आशिल्ले.
पूण काँग्रेसीच्या उमेदवारीचेर केदार नायक हे जैतिवंत जाले आनी भाजप कार्यकर्त्यांचो असंतोष हो वेंचणुकेच्या निकाला वेल्यान दिसून आयिल्लो. पूण कांय म्हयन्यां भितरच राजकी घडामोडी उपरांत आमदार केदार नायक हे काँग्रेस पक्षाक सोडचीट दिवन भाजपांत प्रवेश केलो. काँग्रेस पक्ष सोडिल्ल्यान आमदार केदार नायक हांचेर काँग्रेसीचे कार्यकर्ते सुमारा भायर निरशेल्यात. काँग्रेसीचो वापर करप आनी उपरांत आमदार जाले उपरांत भायर मारप अशी निती आपणायिल्ल्याचो आरोप मतदारसंघांतले काँग्रेस कार्यकर्ते आनी पदाधिकारी आमदार नायक हांचेर करतात. तशेंच जयेश साळगांवकार आनी उपरांत केदार नायक हे भाजपांत वांटेकार जाल्ल्यान पक्षांत पोरणें आनी नवे कार्यकर्ते असो भेदभाव सुरू जाला. तशेंच ह्या मतदारसंघांत वेंचीक समाज कार्डाचोय वापर जायत आशिल्ल्याचें फाटल्या चार वेंचणुकेंतल्यान दिसून आयलां.
ह्या मतदारसंघांतल्यान भाजपा वतीन ज्येश्ठ फुडारी दिलीप परुळेकार हांचे सयत जयेश साळगांवकार हे परतून वेंचणूक लडोवपाक इत्सूक आसात. तांणी वेंचणुकेचे नदरेन आपल्या कार्यकर्त्यांच्यो गांठीभेटी घेवपाक सुरवात लेगीत केल्या. आदले मुख्यमंत्री डॉ. विल्फ्रेड डिसौझा हांकां हारोवन ह्या मतदारसंघांत भाजपाचीं मुळां रोवपाचें स्रय दिलीप परुळेकार हांकां वता. दोन फावटी तांणी भाजपाक ह्या मतदारसंघांत प्रतिनिधित्व मेळोवन दिल्लें.
तशेंच पयलींचे काँग्रेस कार्यकर्ते आनी जिल्हो पंचायत वांगडी आशिल्ले जयेश साळगांवकार हे 2017चे वेंचणुकेंत गोवा फॉरवर्ड पार्टीच्या उमेदवारीचेर आमदार म्हूण वेंचून आयिल्ले. पूण उपरांत गोवा फॉरवर्डाक सोडचीट दिवन तांणी भाजपांत प्रवेश केलो. पूण थळावे भाजप कार्यकर्ते तशेंच मतदारांनी न्हयकारिल्ल्यान साळगांवकार हांकां फाटले वेंचणुकेंत हार खावची पडली. ह्या वेळार पक्ष परतून उमेदवारी दितलो हे आशेचेर परुळेकार आनी साळगांवकार हे आसात.
काँग्रेसी वतीन मतदारसंघांतले ज्येश्ठ फुडारी तुलिओ डिसौझा हे परतून विधानसभा वेंचणूक लडोवपाक इत्सूक आात. ते आदले मुख्यमंत्री डॉ. विल्फ्रेड डिसौझा हांचे जांवय आसात. 2012 वर्सा पक्षान आदले मंत्री सर्गेस्त सुरेश परुळेकार हांकां तिकेट दिल्ल्यान निरशेवन तांणी अपक्ष म्हूण वेंचणूक लडयिल्ली आनी ते दुसऱ्या क्रमांकाचेर आयिल्ले. उपरांत 2017 ते 2022 वर्सा काँग्रेसीच्या उमेदवारीचेर तांचो दावो आशिल्लो. पूण 2017 वर्सा मतदारसंघांतल्यान कळंगूटचे आदले आमदार आग्नेल फर्नांडीस हांकां उमेदवारी मेळिल्ल्यान ते फाटी सरिल्ले. जाल्यार 2022 चे वेंचणुकेंत आमदार केदार नायक हांचे खातीर प्रचार्य कार्य केल्लें.
तशेंच काँग्रेसीचे उमेदवारी खातीर आदले उत्तर गोंय जिल्होध्यक्ष विरेंद्र शिरोडकार हे दादवेदार आसात. शिरोडकार हे रेईश मागूश पंचायतीचे आदले सरपंच तशेंच सद्याचे पंच वांगडी आसात. फाटल्या खूबशा वर्सां सावन ते पक्षा कडेन एननिश्ठ आसात. तशेंच पक्षाच्या गट समितीची तुलियो वा शिरोडकार हांकां उेमवदारी मेळची अशी इत्सा आसा.
फाटले वेंचणुकेंत रिव्होल्युशनरी गोवन्स पार्टी वतीन (आरजी) रोहन कळंगूटकार हांणी साळगांवांतल्यान वेंचणूक लडयिल्ली. सद्या आरजी पक्षां मदीं दोन गट निर्माण जाल्ल्यान कार्यकर्त्यां मदीं गोंदळाचें वातावरण निमाण जालां. ताका लागून फाटले फावटी प्रमाण अंदूंचे वेंचणुकेंत ह्या पक्षाचो प्रभाव साळगांवां दिसप तसो उणोच आसा. समाजीक कार्यकर्ते राजेश दाभोळकार हे लेगीत साळगांवांतल्यान वेंचणूक लडोवपाक इत्सूक आसात. आमदार केदार नायक तशेंच भाजप सरकाराच्या कार्यपद्दतीचेर दाभोळकार हे सोशल मिडियाच्या माध्यमांतल्यान आवाज उठयत आसात.
साळगांव मतदारसंघ हो स पंचायत वाठारांनी विभागला. हातूंत साळगांव, गिरी, सांगोल्डें, रेईश- मागूश, पिळर्ण- मार्रा आनी नेरूल हांचो आस्पाव आसा. तशेंच सांगोल्डें, पिळर्ण- मार्रा हे गांव पर्वरेक जोडल्यात.
फाटल्या साडेचार वर्सांत ह्या मतदारसंघांत आमदारांनी मुळाव्या सुविधांचेर भर दिला. पिळर्ण उद्देगीक वसणुकेंत सुरू आशिल्ल्या उदका शुद्धीकरण प्रकल्पाचें बांदकाम निमाण्या पांवड्यार आसा. साळगांव सड्यार उबारतात त्या बार्देस म्हालांतलो म्हत्वाचो असो अत्याधुनीक वीज प्रकल्पूय पुराय जावपाचे वाटेर आसा. रस्ते, भुंयगत वीज वाहिन्यो, खेळां मैदानांचो विकास हे सारके प्रकल्प राबयल्यात.
ह्या मतदारसंघांत बेरोजगारीची व्हड समस्या आसा. दर्यादेगे कडेन निगडीत आशिल्ले पिळर्ण उद्देगीक वसणूक आसून लेगीत मतदारसंघांतलो तरणाटो वर्ग रोजगाराची वाट पळयता. तेच बराबर उदक, वीज, कांय कडेन सुरळीत रस्त्यांचो उणाव आसा. कोमुनिदाद सुवातेंतलीं घरां, शेत जमीन पुरोवन जावपी बेकायदो बांदकामां, गिरी गांवांत निर्माण जावपी वर्सानवर्स हुंवाराची स्थिती. ग्रीन पार्क ते मोंतेगिरी अंडरपास मजगतीं राष्ट्रीय म्हामार्गा वेली सर्व्हीस रस्त्याचो उणाव ह्या सारक्या समस्यांचेर कसलोच उपाय काडिल्लो ना.
———-
बॉक्स साळगांव मतदारसंघ वेंचणुकेंतले निकाल. जैतिवंत आनी दुसऱ्या स्थानार आशिल्ले उमेदवार.
1989ः विल्फ्रेड डिसौझा ः (काँग्रेस)- 6229 मतां, पुनाजी आचरेकार ः (महाराष्ट्रवादी गोमंतक पार्टी)- 5802 मतां
1994 ः विल्फ्रेड डिसौझा ः (काँग्रेस) 6479 मतां, दिलीप कळंगूटकार ः (शिवसेना) 5184 मतां
1999 ः विल्फ्रेड डिसौझा ः (गोवा राजीव काँग्रेस पार्टी) 5006 मतां, दिलीप कळंगूटकार ः (महाराष्ट्रवादी गोमंतक पार्टी) 4542 मतां.
2002 ः विल्फ्रेड डिसौझा ः (राष्ट्रवादी काँग्रेस पार्टी) 4263 मतां, ट्रॉजन डिमेलो (काँग्रेस) 3537 मतां
2007 ः दिलीप परूळेकार ः (भाजप) 6639 मतां, विल्फ्रेड डिसौझा (राष्ट्रवादी काँग्रेस पार्टी) 4682 मतां
2012 ः दिलीप परूळेकार ः (भाजप) 10084 मतां, तुलिओ डिसौझा (अपक्ष) 4276 मतां
2017 ः जयेश साळगांवकार ः (गोवा फॉरवर्ड पार्टी) 9735 मतां, दिलीप परूळेकार (भाजप) 7589 मतां
2022 ः केदार नायक (काँग्रेस) 10045 मतां, जयेश साळगांवकार (भाजप) 8146 मतां
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
