६ वर्सां पिरायेचे चलयेचेर बलात्कार करप्याक मरण ख्यास्त
भांगरभूंय | प्रतिनिधी
न्यायाधीशांनी निकालांत त्या सानुल्या खातीर बरयली कविता
नर्मदापुरम, खबरां संस्था: नर्मदापुरम जिल्ह्यांतल्या सिवनी मालवा हांगा ६ वर्सां पिरायेचे चलयेचेर बलात्कार आनी उपरांत तिचो खून केल्ल्या प्रकरणांत दोशी सांपडिल्ल्या मनशाक न्यायालयान मरणाची ख्यास्त आयकयल्या. न्यायालयान आरोपीक ३००० रुपयांचो दंडूय दिला. तशेंच, पिडेस्ताच्या कुटुंबाक ४ लाख रुपयांची भरपायूय मेळटली.
शुक्रारा पयलो अतिरिक्त सत्र न्यायाधीश तबस्सुम खान हांच्या न्यायालयांत सुनावणी जाली. तांणी आरोपी अजय वाडिबाला दोशी घोशीत करीत निकाल आयकयलो. न्यायाधीशांनी तांच्या निकालांत त्या सानुल्या खातीर कविताय बरयली.
बलात्कार आनी खून केले उपरांत कूड झोपांनी भिरकायली
ही घडणूक २ जानेवारीक घडली. रातच्या सुमार ९ वरांचेर आरोपी अजयान ते चलयेचें अपहरण केलें. तिच्या कुटुंबान तिचो पुराय गांवांत सोद घेतलो. मात चली सांपडूंक ना. तपासा मजगतीं पुलिसांनी अजयाक ताब्यांत घेतलो. चवकशे मजगतीं तांणी आपलो गुन्यांव कबूल केलो. तांणी सांगलें, तो चलयेक झोपांनी घेवन गेलो आनी तिचेर बलात्कार केलो. तिणें किंळच्यो मारतांच तांणी तिचो गळो पिळून तिचो खून केलो आनी कूड झोपांनी भिरकायली.
ही सुनावणी ८८ दीस चल्ली आनी ३३ पुरावे सादर केले
ह्या प्रकरणांतलें चालान १३ जानेवारीक न्यायालयांत सादर केलें. सुनावणी ८८ दीस चल्ली. सरकारी वकिलांनी न्यायालयांत ३९ साक्षीदार सादर केले. सगल्यांनी घडणुकेची पुश्टी केली. तशेंच ९६ कागदपत्रां आनी ३३ पुरावे सादर केले. डीएनए रिपोर्टूय पॉझिटिव्ह आयलो. विशेश सरकारी वकील मनोज जाट हांणी सरकाराची बाजू मांडली. सगल्या पुराव्यांच्या आदाराचेर सरकारा आरोपीक दोशी थारायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
