भांगरभूंय | प्रतिनिधी
तंत्रज्ञानाचे फायदे आसात, तशेंच लुकसाणूय. ताचे गैरफायदेच घेवपी चड आसात. सायबर मळाचेर हें सदांच पळोवंक मेळटा. हे गैरवापर आडावपाक, गुन्यांव सोदून काडपाक तंत्रज्ञांनीच उपाय सोदून काडल्यात. मात तांचो वापर आमी करतातूच अशें ना. आयज मेळत थंय मोबायल फोनाचो नंबर जोडून दवरला. आधार कार्ड तर सगल्या सरकारी कागदांक जोडलां. एखादो दाखलो हाडूंक ना, जाल्यार फक्त आधार कार्डाच्या क्रमांका वयल्यान तुमची सगली म्हायती मेळपाक शकता. मोबायलाच्या नंबरा वयल्यान आयकराचें काम करपी एजंटाक तुमचे अकावंट कितले, कितलो आयकर कापला, ताची म्हायती मेळटा. पूण, थोडे ठकसेन हे सुविधेचो गैरफायदो घेतात आनी लोकांक नाडटात. हालींच गोंय भाजपान मुख्य वेंचणूक आयुक्ताची भेट घेवन तांकां मतदारांची वळेरी सुदारपाची मागणी केली. दोन मतदारसंघांनी नांवां, मेल्ल्या मनशांचीं नांवां वळेरेंत आसात. ताचे वरवीं बोगस मतदान जावं येता. दोन कडेन मतदान करपीय हजारांनी भारतीय आसतले. अत्याधुनीक तंत्रज्ञान वापरून ह्या गुन्यांवकारांक सोदून ख्यास्त करपाक जाय. रिव्होल्युशनरी गोवन्स (आरजी) पक्षान 2021 वर्सा बोगस मतदारां आड आवाज काडिल्लो. कृतीय केल्ली. त्या वेळार तांच्या विरोधकांनी टिका केल्ली. चार वर्सां उपरांत आतां सगलेच पक्ष गोंयांत बोगस मतदार आसात, असो दावो करपाक लागल्यात. थोडे तर गोंयांत पांच लाख रोहिंग्या मुस्लीम आसात, अशें म्हणटात. सगल्यांचें म्हणणें खरें मानलें, जाल्यार हो प्रकार म्हाभिरांकूळ म्हणचो पडटलो.
मतदान वळखपत्राक आदार कार्ड नंबर जोडपाचें काम वेगान करचें, एकाच कुटुंबांतले मतदार सारकी नोंदणी जावंक नाशिल्ल्यान शिंपडून पडल्यात, एकाच पत्त्याचेर खूब मतदार रावतात, राज्य सोडून गेल्यात- संवसाराक अंतरल्यात त्या मतदारांचीं नांवां वळेरेंतल्यान काडचीं, जल्म आनी मरणाचे नोंदणेचो डेटा वेंचणूक आयोगाक मेळटलो आनी तो आपशीच अपडेट जातलो हाची तजवीज करची, एका मतदाराचें वेगळ्या वेगळ्या मतदारसंघांनी नांव आसा, थोड्यांचें राज्या भायरूय नांव आसा. 2027 चे वेंचणुके पयलीं हें सगलें अपडेट करचें, अशें भाजपा फुडाऱ्यांनी मागलां. फाटोफाट आरजीचो व्हिडियो आयलो. तातूंत स्थलांतरीत कशे मतदार म्हूण नांवनोंदणी करतात, आमी तांचीं नांवां कशीं सोदून काडलीं, तीं डिलीट करपाक लायलीं, तें तांणी सांगलें. हाका राष्ट्रीय पक्ष जापसालदार आसात, असो आरोपूय तांणी केलो. वेंचणूक आयोगान खरें म्हणल्यार खास पंगड नेमून बोगस मतदारांचो सोद घेवपाक जाय. तशी तंत्रज्ञानाची सुविधाय तांचे कडेन आसा. बोगस नांवां तपासपाचें साॅफ्टवॅर तांचे कडेन आसा. घराघरांनी वचून ते पळोवणी करतात. कोणाक कागाळ करपाची आसल्यार वॅबसायट, फोन नंबर दिल्यात. ताचे भायर गोंय सरकाराची यंत्रणा नांवां तपासता, कागाळ जाल्यार तीं रद्द करता. राजकी पक्षांनीय बोगस मतदारांचो सोद घेवपाक जाय. आरजी म्हणटा, ते प्रमाण, भाजपा कडेन सगल्यांत बळिश्ट वावुरप्यांची यंत्रणा आसा. म्हणटकच तिणें हे बोगस मतदार सोदचे. वेंचणूक आयोगा परस ती हें काम बरे तरेन करपाक शकतली. गांवांतल्या लोकांक कोण भायले, भितरले तें खबर आसता. बोगस मतदारांक कोण उर्बा दिता? तांची एकगठ्ठो मतां आपल्याकूच पडचीं म्हूण कोण कितें- कितें करता? खूब कठीण अशे हे यक्ष प्रस्न. बोगस मतदार वाडपाक जापसालदार कोण, ताची जाप सगल्यांक खबर आसा, पूण ती कोण दिवचो ना. कारण, एकामेकांक साह्य करूं, सगल्यांचेच पांय मातयेचे, आमी सगले भाव! ह्या सगल्या पापाचो बुडकुलो पं. नेहरूंच्या माथ्यार फोडपीय आसतले!!
मतदान करपाक येता, तेन्ना आधार कार्ड, मतदार वळखपत्र तपासतात. ताचेर नंबर आसता. तो सर्च करून तें नांव नेमकें कोणाचें, तें खंयच्या- खंयच्या मतदारसंघांत आसा, तें सोदपाक मेळना? मतदार वळेरी करतनाय हें तपासू येता. कोण सांपडटा, ताचें नांव रद्द करूं येता. पूण इतल्याचेरूच रावचें न्हय. ताका उणोच रु. 10 हजारांचो दंड घालचो. बंदखणीची ख्यास्तूय दिवची. गोंयांत बोगस मतदान जाता, अशें म्हणटात, म्हणटकच बिहार, ओडिशा, उत्तर प्रदेशांतल्या गांवांनी कितें जाता आसतलें? खास करून शारा कुशीच्या उपनगरांनी बोगस मतदार चड आसतात. गोंयांत लोकांनी बोगस कागदां सादर करून जमनी घेतल्यात, बेकायदेशीर रेशनकार्डां, मतदान वळखपत्रां, घरक्रमांक घेतल्यात असो आरोप जाता. हाचेर कारवाय कोणे करपाची? पुलिसांनी, वेंचणूक आयोगान तीं तपासल्यार सरकारी अधिकाऱ्यांची सय, शिक्को मेळटलो. ताचे वयल्यान तपास करूं येता. अधिकारी, कर्मचारी दोशी सिद्ध जायत जाल्यार ताका राजिनामो दिवपाक लावं येता. ताणें हीं बेकायदेशीर कामां कोणाच्या सांगण्या वयल्यान केलीं, तेंय कळटलें. हें करपाक सांगपी थळावो फुडारी वा ताचो मुखेल वावुरपी आसतलो!! बोगस मतदार, दोन कडेन मतदान करपी मतदार सगल्याच राज्यांनी आसात, मात राजकी आशिर्वादाक लागून तांकां कोण आडावपाक वचनात. हीच काय ती
आमची लोकशाय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
