भांगरभूंय | प्रतिनिधी
वाळपय : पेळावदें- मोर्लेंच्या ‘उबो गुणो’ ह्या व्हाळवाट न्हंयेच्या खोल भागांत पर्यटकांक (गोंयकार आनी भायले) न्हांवपाक आनी भोंवडे खातीर येवपाक बंदी घालची, अशी मागणी थळाव्या नागरिकांनी केल्या. हे विशीं सत्तरी उपजिल्लोधिकार्यांक निवेदन सादर केलां. तशेंच ह्या निवेदनाची प्रत केरी आनी मोर्ले ग्रामपंचायतीं सयत वाळपय मामलेदारां कडेन दिल्या.
ह्या वाठारांत गिमाच्या दिसांनी पर्यटक बरीच गर्दी करतात. सोरो पियेवन मस्तेपणां करप, व्हडान संगीत वाजोवप, कोयर करप, कंवचेच्यो, प्लास्टिकाच्यो बाटल्यो उडोवप, कागदी कपां, बशयो उडोवप, उश्टें उडोवप अश्या गजालींक लागून हो वाठार बुरसो आनी धोको निर्माण करपी जाला. हाका लागून न्हंयेचें उदक दुशीत जाल्ल्याचें थळाव्यांचें म्हणणें आसा. हालींच अमित पंचांगे (१९) ह्या तरणाट्याक मरण आयिल्लें. ह्यान पयलींय हांगा अश्यो बुडून मरण आयिल्ल्याच्यो घडणुको घडल्यात. हेच फाटभूंयेर ह्या वाठारांत येवपाक बंदी घालपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
