भांगरभूंय | प्रतिनिधी
पणजीः प्रदुशण उणें करपा खातीर केंद्र सरकारान राज्यां खातीर हरीत उर्जा निर्मितीचें लक्ष्य थारायलां. सोलार पॅनल आनी हेर तंत्रगिन्यानाच्या आदारान वीज निर्मिती करपाचो विचार करून गोंय 2029 मेरेन 500 गीगावॉट हरीत उर्जा निर्मितीचें लक्ष्य साध्य करतलें असो विस्वास वीज मंत्री सुदिन ढवळीकार हांणी उक्तायलो. केंद्रान गोंयां खातीर 2030 मेरेन 500 गीगावॉट वीज निर्मिती करपाचें लक्ष्य थारायिल्लें.
केंद्राच्या ब्यूरो ऑफ एनर्जी एफीशिएंसी खाला वीज खात्या वरवीं आंगणवाडींक इंडक्शन कुकटॉप वांटले. ह्या निमतान सचिवालयांत जाल्ले कार्यावळींत मुखेल सोयरे म्हूण उलयतना वीज मंत्री सुदीन ढवळीकार हांणी ही म्हायती दिली. पयल्या पांवड्यार राज्यांतल्या 650 आंगनवाडींक इंडक्शन कुकटॉप दितले. हाचे उपरांत दुसऱ्या पांवड्यार उरिल्ल्या आंगनवाडींक इंडक्शन कुकटॉप दितले.
प्रदुशण उणें करपा खातीर हरीत उर्जा निर्मितीचेर भर दितात. वीज वापर उणो करपा खातीरय वेगवेगळे यत्न सुरू आसात. सरकारी कार्यालयांनी एलईडी बल्ब लायतात. सरकारी आनी अनुदानित शाळांनी टप्प्या टप्प्यान नवे बल्ब आनी फॅन बसयतले. हाका लागून वीजेचो वापर उणो जावपाक मजत जातली अशें तांणी सांगलें. केंद्रान उर्जा संवर्धन कायदो तयार केलां. ह्या कायद्या खाला वीज वाटोवपा खातीर एलईडी बल्ब, इंडक्शन कुकटॉप आनी हेर उपकरणां दितात. इंडक्शन कुकटॉप वांटप हो ह्याच उपक्रमांतलो एक भाग अशें अधीक्षक अभियंतो मयूर हेदे हांणी सांगलें.
ह्या कार्यावळीक अधीक्षक अभियंतो मयूर हेदे, राजीव सामंत, शैलेश बुर्ये, कार्यकारी अभियंतो राजीव नायक आनी हेर अधिकारी हाजीर आशिल्ले.
438 शिक्षणीक संस्थांनी ऊर्जा क्लब हरीत उर्जा आनी वीज संवर्धन हांचे विशीं जागृताय निर्माण करपा खातीर 438 शिक्षणीक संस्थांनी उर्जा क्लब स्थापन केल्यात. वर्ग सोंपतकच बल्ब आनी फॅन बंद करप, तशेंच वीज कशी वाटोवची हे विशीं क्लबा वरवीं विद्यार्थ्यांक शिकयतात अशी म्हायती वीज मंत्री सुदीन ढवळीकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
