भांगरभूंय | प्रतिनिधी
एनजीओः पक्षांतर करपी लोकप्रतिनिधींक शिटकावणी
भांगरभूंय । प्रतिनिधी
मुरगांवः मतदारांनी वेंचून दिल्ल्या लोकप्रतिनिधींनी एकाच पक्षांत रावून लोकांची सेवा करची. सत्ते खातीर एका पक्षांतल्यान दुसऱ्या पक्षांत उडी मारची न्हय. अशें केलें जाल्यार आमी मतदार अश्यो उडयो मारून लोकांच्या मतांचो दुरुपेग करपी आमदारांक आनी हेर लोकप्रतिनिधींक फुडले वेंचणुकेंत योग्य बुद्द शिकयतले, अशी शिटकावणी वेगवेगळ्या बिगर सरकारी संस्थांनी (एनजीओ) दिल्या.
सध्या काँग्रेसीचे आनी हेर आमदार भाजपांत प्रवेश करपाचे वाटेर आसात. ते लोकांचो विस्वासघात करून मंत्रीपदाचे आशेन एका पक्षांतल्यान दुसऱ्या पक्षांत वचपाचें कारस्थान रचतात. शेनवारा 23 जुलयाक वास्को पालिका इमारती मुखार दोन एनजीओचे वांगड्यांनी हाचो निशेध करचे खातीर धरणें धरिल्लें.
आमदारांनी चलयिल्लें हें नाटक हे फुडें खपोवन घेवचे नात. पक्षांतर तरपी आमदारांक फुडले वेंचणुकेंत घरा बसयतले, अशें ह्या वांगड्यांनी सांगलें.
एनजीओंच्या धरणें आंदोलनांत सवेराची तारा केरकार, आमच्या गोंया खातीरचे शंकर पोळजी, जयेश शेटगांवकार, फा. बॉलमॅक्स परेरा, सावियो, अरविंद दोरादो, दामोदर नायक आनी हेर कार्यकर्ते हाजीर आशिल्ले.
वेंचून दिल्ल्या आमदारांनी लोकांची सेवा करपाची मोख दवरची. लोकांचो विस्वासघात करून पक्षांतर करचें न्हय. विरोधांत रावून लोकांची सेवा करात. मतदारांनी एका पक्षाक विटून तुमकां मतदान केलां. तुमकां विस्वासान वेंचून हाडल्यात ते उडयो मारपा खातीर न्हय, अशें शंकर पोळजीन सांगलें.
पक्षांतर करून मतदारांचो विस्वासघात करपी आमदारांनी असोच खेळ चालू दवरलो जाल्यार तांकां घरा धाडटले, अशें हेर उलोवप्यांनी सांगलें.
माकड उडयो मारूं नाकातः तारा केरकार
मतदार मतदान करतना विचार करून करतात. पूण वेंचून आयले उपरांत सुवार्था खातीर आमदार तांचो विस्वासघात करतात जाल्यार ताचो कसलो फायदो? लोकांनी वेंचून दिल्यात जाल्यार लोकांची सेवा करात. अश्यो माकड उडयो मारूं नाकात, असो सल्लो सवेराच्या तारा केरकार हांणी दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
