भांगरभूंय | प्रतिनिधी
दिवचल : कळसा – भांडुरा प्रकल्पा खाला बांद आनी उदक घुंवडावपाच्या येवजण्यांक एकवटींत विरोध करचे खातीर बुधवारा खानापूरच्या वाय. बी. चव्हाण हॉलांत व्हड संख्येन पिडीत शेतकार, समाजीक – पर्यवरण कार्यकर्ते, राजकी आनी अध्यात्मीक लोक एकठांय आयले.
कॅप्टन नितीन धोंड हांणी सांगलें, कर्नाटक निरावरी निगम लिमिटेडान (केएनएनएल) कणकुंबी वाठारांत कळसा प्रकल्पाचें काम हातांत घेतलां. आतां गरजेची मंजुरी घेनासतना भांडुरा प्रकल्पाचें काम सुरू करचे खातीर जमीन संपादना खातीर नोटिसो जारी केल्यात, जें लोकशाय विरोधी आसा. तेचवरी म्हादय प्रदेशांतलें पर्यावरण आनी रानवटी जिवां खातीर गंभीर धोको निर्माण करपी आसा.
समाजीक कार्यकर्ते दिलीप कामत हांणी सांगलें, खानापूर म्हाल हो प्राचीन काला सावन दाट रानां खातीर तशेंच घोग्यांनी पावसा खातीर फामाद आसा. अश्या पर्यावरणीय नदरेन संवेदनशील वाठारांत बांद आनी उदक घुंवडावपाच्या प्रकाराक लागून लोकांचे जिवीत आनी पोट भरपाचें माध्यम धोक्यांत येतलें. केएनएनएलच्या प्रस्तावीक प्रकल्पांक लागून अस्तंत घांटातलीं रानां मारिल्ल्यान आनी पर्यावरणाचें व्हड लुकसाण जातलें. म्हादय – मलप्रभा वाठारांत उदकाचो गंभीर उणाव जातलो. हे खातीर तांणी सरकारा कडेन नेरसा चालू आशिल्लें पायप उत्पादन आनी संबंदीत कामां तत्काळ बंद करपाची विनवणी केली. असोगा, मंटुर्गा, रुमेवाडी, करंबळच्या शेतकारांक जमीन संपादना कातीर नोटिसो जारी केल्ल्यो. त्यो अन्याय्य आनी अलोकतांत्रीक मानल्यात, अशेंय तांणी म्हणलें.
सुजीत मुलगुंड, शिवाजी कांगणीकर, अॅड. नीला देशपांडे, मल्लिकार्जून वली आनी हेर साबार पिडीत शेतकारांनी म्हादय देगणांतल्या धरण बांदपाच्या आनी उदक घुंवडावपाच्या येवजण्यांच्या प्रस्तावीत प्रकल्पां आड नाराजी उक्तायली. सुमार पाव शेंकड्या उपरांत, बेळगांव जिल्ह्यांतल्या पिडीत शेतकार संबंदीत समाजीक – पर्यावरणीय कार्यकर्ते कर्नाटकाच्या कळसा भांडुरा प्रकल्पाक खर विरोध करपा खातीर एके माचयेर आयले, अशें गोंयचे पर्यावरण मोगी राजेंद्र केरकार हांणी सागंलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
