भांगरभूंय | प्रतिनिधी
पणजी : राज्यांतल्या उद्देगीक कामगार आनी कर्मचाऱ्यांचे सुरक्षे खातीर सरकार बांदील आसा आनी हाका लागून ‘स्कील ऑन व्हील्स’ उपक्रम सुरू केला, अशी म्हायती मुख्यमंत्री डॉ. प्रमोद सावंत हांणी दिली. बिरेस्तारा पणजे आयोजीत केल्ल्या पयल्या उद्देगीक सुरक्षा आनी भलायकी प्रदर्शनाच्या उक्तावण सुवाळ्यांत ते उलयताले. ह्या वेळार मंत्री निळकंठ हळर्णकार हाजीर आशिल्ले.
‘स्कील ऑन व्हील्स’ उपक्रमांतल्यान शाळा, महाविद्यालयांत उद्देगीक अपघात, वीज सुरक्षीतताय, आपत्ती वेवस्थापन आनी मानसीक भलायकी अशा विशयांचेर मार्गदर्शन दितले. राज्यांतल्या वेगवेगळ्या उद्देगीक क्षेत्रांत काम करपी कामगार आनी हेर कर्मचाऱ्यांचे सुरक्षतायेची जतनाय खाजगी कंपनींनी घेवप गरजेचें आसा. सुरक्षा आसल्यार कामगारांच्या कामाचो दर्जोय वाडटा. हाचो फायदो कंपनींकूच जाता अशें मुख्यमंत्र्यान सांगलें.
खाजगी कंपनींनी तशेंच सरकारी अधिकाऱ्यांनीय ह्या प्रदर्शनाक भेट दिवची. कारखानो आनी बॉयलर खात्यान बॉयलर चालक अभ्यासक्रम सुरू केला. हाका लागून तरणाट्यांक रोजगाराची संद मेळटली. हेर सरकारी खात्यांनीय सुरक्षेक प्राधान्य दिवपी उपक्रम सुरू करचे. विकसीत गोंय 2037 चें सपन साकार करपा खातीर तरणाट्यांनी कुशळटाय विकसीत करपाची गरज आसा. तरणाट्यांनी उपलब्ध आशिल्ल्या संदीचो लाव घेवचो, असो मुख्यमंत्री डॉ, प्रमोद सावंत हांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
