भांगरभूंय | प्रतिनिधी
वास्को ः मुरगांव पालिकेन प्रायोगिक तत्वांचेर शारांतल्या चार सुवातींनी पे पार्किंग सुरू केल्या. हाका लागून वाहन चालकां मदीं शिस्त येतली, येरादारी वेवस्था सुदारतली आनी पालिके खातीर येणावळ मेळटली अशें मुरगांवचे नगराध्यक्ष गिरीश बोरकार हांणी बिरेस्तारा सांगलें. हातूंत वाहन चालकांनी योग्य सहकार्य करचें असो उलो तांणी केलां.
वास्को शार हें नियोजीत शार. पूण फाटल्या कांय वर्सांत वाहनांचो आंकडो वाडला. बाजारांत येवपी लोकांक बाजारपेठेच्या वाठारांत पार्किंग मेळप कठीण जावपाक लागलें. ह्या प्रकरणांत मुरगांव नगरपालिकेन योग्य पावलां उबारचीं अशी मागणी नागरिकांनी केल्ली. ही गजाल लक्षांत घेवन नगराध्यक्ष बोरकर, नगरसेवक श्रद्धा महाले, येरादारी पुलीस निरिक्षक शैलेश नार्वेकार आनी येरादारी अधिकारी हांणी जानेवारी 2024 वर्सा पे पार्किंग संबंदी पळोवणी सुरू करून कांय सुवाती वेंचून काडल्यो.
उपरांत मुरगांव पालिका मंडळाचे बसकेंत हे पे पार्किंगा संबंदी चर्चा जाली आनी प्रायोगिक तत्वाचेर कांय सुवातींनी पे पार्किंग करपाचो निर्णय घेतलो. तो थाराव चालीक लायलो. सगळ्यो औपचारिकता पुराय जाल्ल्यान आतां पे पार्किंग सेवा सुरू जातली.
आतां पे पार्किंगाक लागून येरादारी वेवस्थेंत सुदारणा जातली अशें नगराध्यक्षान सांगलें. हांगा एचडीएफसी बँके मुखार अंतर्गत रस्त्याचे एके वटेन पे पार्किंगाची वेवस्था आसतली. रजनी स्टोर, आदले उपजिल्होधिकारी कार्यालय, वास्को टपाल खात्या मुखार रस्त्यांचेर पे पार्किंगाची वेवस्था केल्या. ही पे पार्किंग सकाळीं 8 ते रातीं 8 मेरेन आसतली. चार चाकी वाहनां खातीर पार्किंग शुल्क पयल्या वराक वीस रुपया आनी उपरांतच्या दरेका वराक पंदरा रुपया आसतलें. चार चाकी पे पार्किंग जाग्यार कोणेय दुचाकी पार्क केल्यार ताचे आड कारवाय जातली अशेंय नगराध्यक्षान सांगलें.
रेंट-अ- कार शारांतल्या कांय सुवातींनी आपल्यो गाडयो पार्क करतात. येरादारी पुलीस आनी येरादारी अधिकाऱ्यांनी तांचेर नदर दवरची. रेंट-अ- कार गाडी पे पार्किंग जाग्यार पार्क आसल्यार तांकां शुल्क भरचें पडटलें अशें बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
