भांगरभूंय | प्रतिनिधी
पणजी ः पणजेंतलीं 4 दुकानां काल रातीं चोरांनी फोडलीं. आयज सकाळीं दुकानदार दुकानां उगडपाक आयलें तेन्ना हो प्रकार उजवाडाक आयलो. हे घडणुकेची म्हायती पुलिसांक मेळ्ळे उपरांत तांणी पंचनामो केलो. चोरयेचो पुराय प्रकार सीसीटीव्ही कॅमेऱ्यांत कैद जालां. ताचे मजतीन पुलीस चोरांचो सोद घेतात.
सूत्रांनी दिल्ले म्हायती प्रमाण, पणजे शारांतल्या पोरण्या सचिवालयाच्या फाटल्यान ‘जोसे फाल्कांव’ नांवाचो रस्तो आसा. ह्या रस्त्या कुशीक आशिल्लीं चार दुकानां काल रातीं 9 एप्रीलाक चोरांनी फोडलीं. हातूंत दोन सोऱ्याचीं, 1 मोबायल स्टोर, आनी 1 प्लास्टीक वस्तूंचें दुकान आसपावीत आसा. सकाळीं धनी दुकानां उगडपाक आयले तेन्ना शटर तोडिल्ले दिसलें. तांणी रोखडीच पुलिसांक म्हायती दिली. मजगतीं, मोबायल स्टोरा मुखार आशिल्ल्या सीसीटीव्ही कॅमेऱ्याचेर हो चोरयेचो प्रकार कैद जाला. ह्या दुकानांतल्यान चोरांनी एक म्हारग मोबायल फोन आनी सुमार 15 हजार फारायले.
मजगतीं, पुलिसांनी अनवळखी व्यक्तीं आड गुन्यांव नोंद करून चवकशी सुरु केल्या. हो चोरयेचो पुराय प्रकार सीसीटीव्ही फुटेजांत कैद जालां. हाचेर आदारून पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
