भांगरभूंय | प्रतिनिधी
नवी दिल्ली, खबरां संस्था ः पॅकेज केल्ल्या खाणांनी साकर, मीठ आनी हानीकारक चरबी कितली आसा हाचे विशीं गिरायकांक स्पश्ट म्हायती मेळची हे खातीर तीन म्हयन्यां भितर नवे नेम तयार करपाचो आदेश सर्वोच्च न्यायालयान केंद्र सरकाराक दिला.
एका सुनावणे वेळार हें आदेश दिलें. गिरायक चड करून फटीच्या दाव्याचेर विस्वास दवरून पळय नासतना पदार्थ विकतें घेतात. देखून पदार्थांच्या पॅकेजींचेर तातूंतल्या घटकां विशीं म्हायती व्हड अक्षरांनी दिवची अशी मागणी आशिल्ली.
केंद्र सरकार कितें म्हणटा?
संबंदीत विशयाचेर 14 हजारां परस चड सुचोवण्यो आनी अभ्यास अहवाल मेळ्ळ्यात. हे खातीर एक खाशेली तज्ञ समिती नेमल्या आनी ती बेगीनांत बेगीन अहवाल तयार करतली. उपरांत भारतीय अन्न सुरक्षा आनी मानक प्राधिकरण (FSSAI) लेबलिंग संबंदी सुदारीत नेम जारी करतले अशें सरकारान न्यायालयांत सांगलें.
आयसीएमआरची शिटकावणी
आयसीएमआर (इंडियन काउन्सिल ऑफ मेडिकल रिसर्च) खाला आशिल्ल्या हैदराबादच्या एनआयएन (नॅशनल इन्स्टिट्यूट ऑफ न्यूट्रीशन) हे संस्थेन हालींच भारतीयां खातीर नवी आहार मार्गदर्शक तत्वां जाहीर केल्यांत. पॅकेज केल्ल्या खाणां-जेवणांचेर ‘नेचरल’, ‘हेल्दी’, ‘लो फॅट’ सारकिल्ली उतरां बरयतात, पूण हे दावे चड करून अर्दकुटे वा चुकीचे, दिशाभूल करपी आसतात. देखीक एक पदार्थ ‘नेचरल’ अशें म्हण्टात, पूण तातूंत फकत एक वा दोन सैमीक घटक आसतात आनी उरिल्लीं सगळीं प्रक्रिया केल्लीं वा कृत्रीम आसतात.
गिरायकांनी कितें करचें?
खास करून साकर, मीठ आनी सॅच्युरेटेड फॅट चड आशिल्ल्या खाणांचो भलायकेचेर वायट परिणाम जाता. देखून नागरिकांनी पॅकेजीचेर आशिल्ली म्हायती बारीकसाणेन वाचची, फटीच्या दाव्याचेर विस्वास दवरचो न्हय, शक्य आसल्यार ताजें आनी सैमीक अन्न वेंचचें अशें तज्ञ सांगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
