भांगरभूंय | प्रतिनिधी
नवी दिल्ली, खबरां संस्था ः गुरवारपणांत आनी बाळंतपणांत बायलांक मरण येवपाचो अहवाल संयुक्त राश्ट्रांनी जाहीर केला. संवसारांत दर 2 मिनटांनी एका बायलेक गुरवारपण वा बाळंतपणांक लागून मरण येता अशें अहवालांत म्हणलां.
अहवाला प्रमाण, भारतांत 2023 वर्सा सुमार 19 हजार गुरवार बायलांक मरण आयलें. हाचो अर्थ दर दिसा सरासरी 52 बायलांक मरण येता. हे प्रमाण संवसारांत गुरवारपणांत जावपी वट्ट मरणांतले 7.2% आसा. हे वळेरेंत भारत दुसरे क्रमांकाचेर आसा. नायजेरिया पयले सुवातेर आसा.
ह्या अहवालांत पाकिस्तानांतल्या मरणांचोय आंकडो आसपावीत केला. पाकिस्तानांत 2023 वर्सा 11 हजार लोकांक मरण आयलें. म्हळ्यार दिसाक सरासरी 30 जाणांक मरण आयलां. आंकडेवारी प्रमाण नायजेरियांत 75 हजार बायलांक मरण आयलें. हे प्रमाण संवसारांतल्या गुरवार बायलांक मरण येवपांतलें 28.7% इतले आसा.
भारतांत 23 वर्सांत गुरवाण बायलांच्या मरणांत 78% उणाव
भारतांत 2000 ते 2023 ह्या काळांत गुरवाण बायलांच्या मरणाचे प्रणाण 78% उणें जालें. डब्ल्यूएचओच्या मतान, भलायकी जतनाय सुविधांनी सुदारणा जाल्ल्यान 2000 ते 2023 ह्या काळांत संवसारभर एमएमआर 40% उणो जालो असो अदमास आसा.
अशें आसलें तरी ह्या आंकड्यां वयल्यान गुरवार बायलां खातीर परिस्थिती आजूनय गंभीर आसा हे कळटां. भलायकी सुविधी नेटान सुदारली ना जाल्यार हें संकश्ट आजून गंभीर जावं येता अशें डब्ल्यूएचओचे मुखेली डॉ. टेड्रोस घेब्रेयसस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
