भांगरभूंय | प्रतिनिधी
गोंयभर भावीक, भक्तगण लागले तयारेक
दिवचल: लाखांनी भाविकांचें श्रद्धास्थान आशिल्ल्या आनी गोंय तशेंच हेर राज्यांत नामना आशिल्ल्या शिरगांवच्या श्रीदेवी लयराईचो नामनेचो जात्रोत्सव अंदूं 2 मे सावन सुरू जावन चार दीस कौलोत्सव जातलो. ही जात्रा म्हणल्यार गोंयकारांची जिवाभावाची जात्रा आशिल्ल्यान चड करून गांवगिऱ्या वाठारांतले शेंकड्यांनी धोंड तयारेक लागल्यात.
देवीचे धोंड व्रत स्विकारून उपास आनी सवळ्याक पाळो दिवन मंगलमय वातावरणांत देवीची भक्ती करतात. पांच दीस कुशीक रावन सवळ्याक पाळो दितना देवूळ, न्हंयची देग, तळें वा सैमीक झरे, धोंडा खातीर उबारतात ते माटव हांगा पांच दीस व्रत करतात.
सामान्य नागरीक, ल्हान भुरगीं तशेंच ज्येश्ठ बायलां ह्या सवळ्याक पाळो दिवन अग्निदिव्या खातीर तयार रावतात. अग्निदिव्य पळोवपा खातीर मध्यान रातीं व्हड गर्दी जाता. पांच दीस लाखांनी भावीक शिरगांवां भेट दितात.
देवस्थान समितीचे नवे अध्यक्ष दीनानाथ गांवकार हांणी जात्रोत्सवा निमतान लाखांनी भावीक पांच दीस हाजेरी लायत आशिल्ल्यान आतां सावनूच तयारी सुरू केल्या. मामलेदार आनी हेर यंत्रणे वतीन जोड बसका घेवन वेवस्थापन वेवस्थीत करपा खातीर प्रक्रिया सुरू केल्या. रोखडीच बसका घेवन नियाळ घेतले अशें तांणी सांगलें.
गोंय आनी शेजारच्या राज्यांतल्यान हजारांनी भावीक शिरगांवां येवपाचे आशिल्ल्यान पुराय गांवांत उमेदीचें वातावरण आसता. ते खातीर नवी खरेदी, रंगकाम बी कामां घरा कणकणीं सुरू जाल्यांत.
मोगरीच्या काळ्यांक ह्या उत्सवांत व्हड मागणी आसता. ते खातीर खूबशा वाठारांतल्यान शेंकड्यांनी लोक मोगऱ्याची विक्री करतात. लाखांनी रुपयांची उलाढाल जाता. मोगरीचे कळे जात्रे खातीर मेळचे हे खातीर गोंय आनी हेर राज्यांतल्यान ताचें वेवस्थापन करतात.
जात्रे वेळार लाखांनी रुपयांची उलाढाल जायत आसता. नवी खरेदी तशेंच कपडे, खाणां, फळां, फुलां हाका व्हड मागणी आसता. मोगरीच्या कळ्यांक व्हड प्रमाणांत मागणी आशिल्ल्यान गोंय तशेंच हेर राज्यांतल्यानूय शेंकड्यांनी लोक मोगरीचे कळे विकपा खातीर शिरगांवां दाखल जायत आसतात.
बाजारपेठेंत ते निमतान लाखांनी रुपयांची उलाढाल जायत आसता. दर वर्सा नव्या धोंडाची नोंदणी जायत आशिल्ल्यान फाटल्या खूबशा वर्सां सावन सुरू आशिल्ले परंपरेंत धोंडाची संख्या वाडत आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
