भांगरभूंय | प्रतिनिधी
स्थलांतरितांच्यो बेकायदो वस्त्यो, बांधकामां पयलीं मोडचीं
पणजी : सरकारान बेकायदेशीर तरेन बांदिल्लीं घरां मोडपाचो निर्णय घेतला. अशें करतना मूळ गोंयकारांच्या घरांक संरक्षण दिवचें. ताचे पयलीं मूळ गोंयकार कोण हाची व्याख्या स्पश्ट करची. राज्यांत स्थलांतरितांच्यो बेकायदो वस्त्यो, बेकायदेशीर बांधकामां पयलीं मोडचीं अशी मागणी रिवोल्युशनरी गोवन्स पक्षाचे अध्यक्ष मनोज परब हांणी केली. बुधवारा पणजे जाल्ले पत्रकार परिशदेंत ते उलयताले. ह्या वेळार अजय खोलकार हेय हाजीर आशिल्ले.
उच्च न्यायालयाच्या निर्णया उपरांत राज्यांतले मंत्री वेगवेगळीं विधानां करून लोकांक आबूज करतात. सरकारान बेकायदो बांधकामा मोडपाचो निर्णय घेतला. सरकारान सदांच स्थलांतरीत लोकांक साथ दिली. आतां ह्या आदेशाक लागून मूळ गोंयकार भियेला. मुख्यमंत्री डॉ. प्रमोद सावंत हांणी हे विशीं नवो कायदो हाडटले अशें स्पश्ट केलां. मात अशें करचे पयलीं मूळ गोंयकार कोण हें स्पश्ट जावप गरजेचें, अशें परब हांणी म्हणलें.
आरजीपीन ह्यान पयलींच हो मुद्दो शेगीत हाजीर केला. नव्या कायद्यांत गोंयकारांच्या घरांकूच संरक्षण दिवचें. राज्यांत जायते लोक स्थलांतरीत जाल्यात. तांणी बेकायदो बांधकामां, झोपडपट्ट्यो उबारल्यात. सरकारान तांकां वीज, उदक अश्यो सुविधायोय दिल्यात. अशांची बेकायदो घरां मोडपाक जाय. पंचायत मंत्री मॉविन गुदिन्हो हांणी आपल्या मतदारसंघांतल्यान ह्या गजालींची सुरवात केल्या. कारण हांणी अश्यो बेकायदो वस्त्यो व्हडा प्रमाणांत आसात, अशेंय तांणी मुखार सांगलें.
आरजीपीन आदीं सावनूच बेकायदो वसणुकेचो मुद्दो हातांत घेतला. हे विशीं आमी पंचायत खात्यांत कागाळी दाखल केल्यात. मात खात्याच्या संचालकांचेर आमचीं प्रकरणां सुनावणेक घेवंक नाशिल्ल्यान चेंपण हाडटात. हाका लागून आमच्या कागाळींचेर तीन ते स म्हयन्यांचो तारखो दितात. ह्यो सुनावण्यो योग्य वेळार जाल्ल्यो जाल्यार आयज हो प्रस्न येवपाचोच न्हय. गोंयकारांच्या बर्या खातीर ह्यो सुनावण्यो बेगीनूच घेवच्यो अशीय मागणी परब हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
