भांगरभूंय | प्रतिनिधी
पणजी ः पोरण्या घरांनी रावपी गोंयकारांक सरकारान थाकाय दिल्या. पोरण्या घराची दुरुस्ती करपा खातीर पंचायत सचिवांनी 3 दिसां भितर परवानो दिवप सक्तीचें आसा. घर धनयांनी 5 वर्सां भाडें फारीक केलां वा हेर कागदपत्रां आसल्यार तांकां आसा तेच सुवातेर घर दुरुस्त करपाक परवानो मेळटलो अशें मुख्यमंत्री डॉ. प्रमोद सावंत हांणी सांगलें. मंत्रीमंडळ बसके उपरांत मुख्यमंत्र्यांनी ही म्हायती दिली.
ग्रामपंचायत सचीव आतां बीडीओ कडल्यान सायट इन्स्पेक्शन अहवाल घेनासतना कामाच्या तीन दिसां भितर परवानो जारी करूंक शकता. पंचायत संचालक सिध्दी हरणकार हांणी आयज तशें परिपत्रक जारी केलां. घर दुरुस्ती परवान्यां संबंदी 1999 आनी 2002 वर्साच्या आदेशांत दुरुस्ती करून पंचायत संचालनालयान नवें परिपत्रक जारी केलां. खंयच्याय निवासी घराची दुरुस्ती करपा खातीर, अर्जदारान फाटल्या 5 वर्सांची घरपट्टी फारीक केलां, आनी घर कायदेशीर रितीन नोंद आसत जाल्यार, ताका दुरुस्तीचो परवानो दिवप सक्तीचें आसा.
अर्जा वांगडा घराचो मॅप, फोटो आनी नोंदणीकृत वास्तुशिल्पी/स्ट्रक्चरल अभियंत्याचो अहवाल दिवपाक जाय. तातूंत दुरुस्तीची शक्यताय आनी खर्चाचो अदमास आसपावपाक जाय. पंचायत सचीव 3 दिसां भितर अर्ज निकालांत काडटलो आनी परवानो दितलो. शुल्क भरले उपरांत रोखडोच परवानो जारी करतले. सचीवान 3 दिसां भितर निर्णय घेतलो ना जाल्यार आपोआप परवानगी मेळ्ळ्या अशें मानतले आनी अर्जदार दुरुस्तीची सुरवात करूंक शकता अशेंय परिपत्रकांत स्पश्ट केलां.
हो नेम फकत एकाच कुटुंबाच्या घरांची दुरुस्ती करपाक लागू जाता. आनी बहुमाळयेच्या वा एका परस चड घरांच्या बाबतींत आदले नेम लागू उरतले अशें सरकारान स्पश्ट केलां
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
