भांगरभूंय | प्रतिनिधी
मुंबय, खबरां संस्था : ‘मुंबय टू गोंय’ हो रस्तो, विमान आनी रेल्वे मार्गान हुपूंयेता. मुंबय ते मांडवी मजगतींच्या रो-रो (रोल-ऑन, रोल-ऑफ) फेरीसेवे खातीर वळख आशिल्ली एम२एम ही कंपनी आतां, वेगवान अशी रो-रो बोट सेवा दर्या मार्गान सुरू करतली. अशी उदकांतल्यान येरादारी बॉम्बे स्टीम नेव्हिगेशन कंपनी वरवीं आदीं मुंबय ते गोंय मजगतीं सुरू केल्ली. मुंबयच्यान भायर सरिल्ली बोट रत्नागिरी उपरांत जैतापूर, मालवण, वेंगुर्ले ह्या बंदरांचेर रावत त्यो बोटी गोंयांत येताल्यो. १९६४ उपरांत ती बंद जाली. आतां १८० वर्सां आदले पद्धतीची ही जल येरादारी वेवस्था परत सुरू जातली.
एके म्हायती प्रमाण, हाका लागून एम२एम फेरीन इटलींतल्यान १५ वर्सां पोरणी आशिल्ली रोपॅक्स बोट विकत घेतिल्ली. मुंबय ही बोट सारकी करपाचें काम सुरू आशिल्लें. हे बोटीची तपासणी केले उपरांत कंपनीन सेवा सुरू करपा खातीर बोट येरादारी महासंचालक आनी हेर अधिकार्यांकडल्यान गरजेचे मंजुरी खातीर अर्ज केला.
मजगतीं मुंबय- गोंय रो- रो फेरीची ट्रायल रन जाल्ल्यान सुरवातेचे तपासणेक मुंबय ते गोंय प्रवास ६.५ वरांनी पुराय जाल्ल्याचो दावो करतात. हाका निमाणी मंजुरी मेळ्ळे उपरांत माजगाव डॉक ते पणजी जेटी डॉक मेरेन फेरी सेवा सुरू जातली. मजगतीं हे परवानगे खातीर गोंय सरकारा कडेन चर्चा सुरू आसा.
एका अधिकार्यान दिल्ले म्हायती प्रमाण, नवे रोपॅक्स बोटींत ६२० प्रवासी आनी ६० गाडयो बसपाक शकतात. भाडें कितलें दवरचें हाचो निर्णय आजून जावंक ना तरी केंद्र सरकार इंधन आनी कर सवलतींचेर सबसिडी दितलें, हाका लागून सेवा आनीक परवडपी जातली, अशी आस्त तांणी उक्तायली.
मजगतीं, मार्च २०२५ मेरेन रो-रो सेवा सुरू करपाचें उद्दीश्ट दवरिल्लें. मात, आतां एप्रिलाचे निमाणे कडेन वा मे म्हयन्याचे सुरवातेक ही येरादारी सुरू जावपाक शकता. महाराष्ट्राचे परिवहन मंत्री प्रताप सरनायक ही रो-रो सेवा सुरू करपाचे यत्न करतात. हे रो-रो सेवेक लागून महाराष्ट्र आनी गोंय दोनूय राज्यांच्या पर्यटना खातीर फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
