लखनौ सुपर जायण्ट्साक चार धांवड्यांनी जैत

भांगरभूंय | प्रतिनिधी

इंडियन प्रिमियर लिगेचे (आयपीएल) 21वे मॅचींत कोलकाता नायट रायडर्साक लखनौ सुपर जायण्ट्स आड फकत 4 धांवड्यांनी हार घेवची पडली. हांगाच्या इडन गार्डन्सांत जाल्ली मॅच अखेर मेरेन उमळशीक वाडोवपी जाली.

लखनौ सुपर जायण्ट्सान कोलकाता मुखार जैता खातीर 239 धांवड्यांची मोख दवरिल्ली. मोखीचो फाटलाव करतना कोलकातान 20 ओव्हरींनी 7 विकेटी व्हगडावन 234 धांवड्यो केल्यो. कोलकाता वतीन मुखेली अजिंक्य रहाणेन आक्रमक बॅटींग केली. पूण, आपल्या पंगडाक जैत मेळोवन दिवपाक ताका जमलें ना.

कोलकाताची ही तिसरी हार थारली. जाल्यार लखनौचें तिसरें जैत थारलें. क्विंटन डी कॉक आनी सुनील नरेन हांणी कोलकाताक आक्रमक सुरवात करून दिली. तांणी पयल्या दोन ओव्हरींनीच सुमार 15ची धांवगती दवरिल्ली. पूण, तिसरे ओव्हरींत डी कॉकाक आकाश दीपान 15 धांवड्यांचेर एलबीडब्ल्यू बाद केलो. पूण, सुनील आनी रहाणे हांणी धांवगती उणी जावपाक दिली ना. दोगांयनी ताबडतोड बॅटींग केली. तांकां लागून कोलकातान पावरप्लेच्या 6 ओव्हरींनीच 90 धांवड्यो पुर्ण केल्यो.

सातवे ओव्हरींत दिग्वेश राठीन सुनीलाक बाद केलो. एडेन मार्करमान ताची कॅच धरली. नरेनान 13 बॉलांनी चार चवके आनी दोन सक्यांचे मजतीन 30 धांवड्यो केल्यो.

दुसरे वटेन रहाणेन आक्रमक रूप कायम दवरतना 26 बॉलांनी अर्द शेंकडो पुर्ण केलो. तशेंच ताणें वेंकटेश अय्यरा वांगडा अर्द शेंकड्याची भागिदारी केली. अखेर रहाणेची आडखळ शार्दुल ठाकूरान 15वे ओव्हरींत पयस केली. हे ओव्हरींत शार्दुलान पयले पांच बॉल वायड घाले. ताणें रहाणेक घुस्पोवन उडोवपाचो यत्न केलो. अखेरेक रहाणे ताच्या जाळ्यांत आडखळो. पुरनान रहाणेची कॅच धरली. रहाणेन 35 बॉलांनी आठ चवके आनी दोन सक्यांचे मजतीन 61 धांवड्यो केल्यो. ते उपरांत कोलकातान रमणदीप सिंग (1) आनी अंगक्रिश रघुवंशी (2) हांच्यो विकेटी रोखड्योच व्हगडायल्यो.

वेंकटेश अय्यर 16वे ओव्हरींत बाद जालो. वेंकटेशान 29 बॉलांनी 45 धांवड्यांची खेळी केली. हातूंत स चवके आनी एका सक्याचो आस्पाव आशिल्लो.

ते उपरांत कोलकाताची आस्त आंद्रे रसेल आनी रिंकू सिंग हांचेर आशिल्ली. पूण, शार्दुलान रसेलाक व्हड कांय करपाक दिलें ना. तो 6 धांवड्यो करून डॅव्हिड मिलराच्या हातांत कॅच दिवन परतलो. दुसरे वटेन रिंकू सिंग खेळत आशिल्लो. ताणें व्हड शॉर्ट मारून मॅच अखेर मेरेन व्हेली.

अखेरचे ओव्हरींत कोलकाताक 24 धांवड्यांची गरज आशिल्ली. पूण, हर्षित राणा आना रिंकू सिंग हांकां 19 धांवड्यो करप शक्य जाल्यो. रिंकू 15 बॉलांनी 38 धांवड्यो करून आनी हर्षित राणा 10 धांवड्यो करून नाबाद उरलो.

लखनौ वतीन आकाश दीप आनी शार्दुल ठाकूर हांणी दरेकी 2, जाल्यार आवेश खान, दिग्वेश राठी, रवी बिश्नोई हांकां एकेक विकेट फावो जाली.

ते पयलीं कोलकातान टॉस जिखून लखनौक बॅटींग करपाचें आमंत्रण दिल्लें. लखनौन 20 ओव्हरींनी 3 विकेटी व्हगडावन 238 धांवड्यो केल्यो. निकोलस पुरनान 36 बॉलांनी सात चवके आनी आठ सक्यांचे मजतीन नाबाद 87 धांवड्यो केल्यो. तशेंच मिचेल मार्शान 48 बॉलांनी स चवके आनी पांच सक्यांचे मजतीन 81 धांवड्यो केल्यो. एडेन मार्करमान 47 धांवड्यांची खेळी केली. ताणें चार चवके आनी दोन सके मारले.

कोलकाता वतीन हर्षित राणान 2 विकेटी घेतल्यो. आंद्रे रसेलाक एक विकेट फावो जाली.