भांगरभूंय | प्रतिनिधी
संबंदीत अधिकाऱ्यांचेर शिस्तभंगाची कारवाय करतले: राणे
पणजी: पर्यटकांचे आकर्शण आशिल्लें बोंडला प्राणी संग्रहालय थंयच्या अधिकाऱ्यांनी पर्यटकां खातीर बंद दवरलें. पूण हाची म्हायती रानां मंत्री आसतनाय आपल्याक दिली ना. हे विशीं संबंदीत अधिकाऱ्यांचेर शिस्तभंगाची कारवाय करून ताचो सविस्तर अहवाल मुख्यमंत्री डॉ. प्रमोद सावंत हांकां दितले अशें रानां मंत्री विश्वजीत राणे हांणी मंगळारा पत्रकारां कडेन उलयतना सांगलें.
बोंडला प्राणी संग्रहालय थंयच्या अधिकाऱ्यांनी अचकीत बंद केल्ल्यान थंय गेल्ले पर्यटक निरशेले. ते विशींची कागाळ मेळ्ळे उपरांत पत्रकारांनी हे विशीं रानां मंत्री विश्वजीत राणे हांकां विचारलें तेन्ना तांणी प्राणी संग्रहालय बंद करीत आसतना ताची म्हायती संबंदीत अधिकाऱ्यांनी रानां मंत्री ह्या नात्यान पयली म्हाका दिवप गरजेची आशिल्ली. पूण त्या अधिकाऱ्यांनी म्हाका विचारिनासतनाच संग्रहालय बंद केलें.
हे विशींचो नियाळ बसका घेवन संबंदीत अधिकाऱ्यांचेर शिस्तभंगाची कारवाय करतले आनी ताचो अहवाल मुख्यमंत्री डॉ. प्रमोद सावंत हांकां सादर करतले अशेंय मंत्री राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
