भांगरभूंय | प्रतिनिधी
भांगरभूंय । प्रतिनिधी
पणजीः बायलां आनी भुरगीं उदरगत खात्याच्या 6 येवजण्यांचो लाव फाटलीं 10 वर्सा वयर जाली प्रलंबित आसा. ह्या येवजण्यां खातीर लोकांचे साडे तीन हजार कोटी परस चड पयशे थकल्यात. सगळ्यांत चड लाडली लक्ष्मी 2 हजार परस चड रक्कम थकल्या. जाल्यार मिशन वात्सल्य हे केंद्राचे येवजणे खातीर समिती नेमूंक नाशिल्ले कारणान ही येवजण आडखून उरल्या.
बायल आनी भुरगीं उदरगत मंत्री विश्वजित राणे हांणी विधानसभेच्या पटलार लेखी जापेत ही म्हायती दिली.
मिशन वात्सल्य हे केंद्रीय येवजणेचे सुमार 1.44 लाख फाटले 6 म्हयने आडखून उरल्यात. हे येवजणे खातीर भुरगीं कल्याण समितीच्या आदेशा सयत स्पोनसरशीप येवजणे खाला आयिल्ले अर्ज जिल्लो पांवड्यार स्पोनशरशीप आनी पाळणा घर येवजणेक मान्यताय समितीन मंजुरी दिवपाक जाय. पूण जिल्लो दंडाधिकारी कार्यालयान आजून मेरेन ह्या समितीची थापणूक करुंक ना. विद्यार्थ्यां खातीर समुपदेशन, मनीसशास्त्र, सामाजीक कार्य, गृह विज्ञान क्षेत्रात मेळपी विद्यार्थ्यां खातीर इंटर्नशीप येवजणेचे फाटले 3 म्हयन्यांत 4.38 लाख आडखून उरल्यात.
जाल्यार गृह आधार येवजणेचे 791 कोटी फाटली साडे चार वर्सा जाली आडखून उरल्यात. बँक आनी आधार कार्डाच्या तांत्रिकी गजालीं खातीर हे आडखून उरल्यात. निश्क्रीय आधार, निश्क्रीय बँक खातेदार, आधार क्रमांक खात्याक जोडूंक ना, खाते ब्लॉक जाला वा गोठयला ह्या सारकिल्ल्या कारणांक लागून तांचो गृह आधार दिवपाक न्हयकार दिल्ल्यान ही रक्कम प्रलंबित आसा. हे विशींची कळोवणी लावार्थ्यांक धाडल्या आनी आपले संबंदीत बँकेत वचून हे विशय सुटावे करपाक सांगला.
लाडली लक्ष्मी येवजणेचे फाटले पाच म्हयने जाले 2713 कोटी थकल्यात. 38 लावार्थ्यांची बीला लेखा संचालनालयाकडे धाडल्यात, फुडले आर्थिक वर्स 2025-26 त पयले तिमाहीक 1915 लावार्थ्यांची बीला धाडटले. पोरणे येवजणेच्या मार्गदर्शक तत्वा नुसार 760 लावार्थ्यांनी आजून मेरेन वांटप दस्तावेज एकठांय केल्ले ना. हाचो उगडास करून दिवपा खातीर खात्यान दोन फावट तांका कळोवणी लेगीत दिल्या.
आवय जी चली जल्माक घालता तिका आर्थिक मजत दिवपी ममता हे येवजणेचे 45.80 लाख फाटले 7 म्हयने पडून आसा. हे अर्ज बँक सिडींग, अवैध आधार, अवैध बँक धारक, आधार कम्रांकाचे प्रमाणीकरण अपेयसी जावप, बॅक खाते ब्लॉक जाला वा गोठयला ही कारणा आसात.
प्रधानमंत्री मातृ वंदना येवजणेचे 12.64 लाख फाटले 2 सप्तक जाले आडखून उरल्यात. नोडल एजिन्सीचे खात्यात निधी ट्रानस्फर करपा खातीर लेखा खात्याक बीला धाडला. नोडली एजन्सीचे खात्यात निधी आयलो काय पात्र लावार्थ्यांक हाचो लाव मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
