भांगरभूंय | प्रतिनिधी
मुख्यमंत्री : वाजपेयी, अडवाणी हांकां लागून भाजपा कडेन आयज घटमूट संघटण
भांगरभूंय । प्रतिनिधी
पणजी : कांय वर्सां आदीं भाजपाची गोंयांत जशी स्थिती आसली तशी आयज केरळ आनी तामीळनाडू राज्यांत आसा. केरळ, तामीळनाडूंत भाजप मूळ धरूंक लागिल्ल्यान फुडल्या 10 वर्सांत दोनूय राज्यांनी निश्चीतपणान भाजपाची सत्ता येतली, असो विस्वास मुख्यमंत्री डॉ. प्रमोद सावंत हांणी उक्तायलो.
मिनेझीस ब्रागांझा सभाघरांत अटल स्मृती संमेलन कार्यावळ जाली. हे कार्यावळींत मुखेल सोयरे म्हूण मुख्यमंत्री उलयताले. केंद्रीय उर्जा राज्यमंत्री श्रीपाद नायक, प्रदेश भाजप अध्यक्ष दामू नायक, आमदार दिगंबर कामत, आदले मुख्यमंत्री प्रा. लक्ष्मीकांत पार्सेकार, आदले मंत्री रामराव देसाय तशेंच हेर मानेस्त कार्यावळीक हाजीर आशिल्ले.
आदले प्रधानमंत्री सर्गेस्त अटलबिहारी वाजपेयी हांचे जल्मशती वर्सा निमितान भारतीय जनता पक्षा वतीन पुराय देशांत तरेकवार कार्यावळी जातात. पणजे मिनेझीस ब्रागांझा सभाघरांत अटल स्मृती संमेलन कार्यावळ जाली. ह्या वेळार आदले मुख्यमंत्री प्रा. लक्ष्मीकांत पार्सेकार, आदले मंत्री रामराव देसाय, आदले मंत्री दयानंद मांद्रेंकार, दिलीप परूळेकार, सुभाष साळकार, कुंदा चोडणकार, आदले सभापती विश्वास सतरकार, विनय तेंडुलकार, दिगंबर कामत, केंद्रीय मंत्री श्रीपाद नायक हांचो पक्षा खातीर दिल्ल्या योगदाना खातीर खासा भोवमान मुख्यमंत्र्यां हस्तुकीं जालो.
आदले प्रधानमंत्री अटलबिहारी वाजपेयी हे कवी, वक्ते तशेंच व्हड संसदपटू आशिल्ले. प्रधानमंत्री आसतना लाहोर बस यात्रा, पोखरण अण्वस्त्र चांचणी अशें क्रांतिकारी निर्णय तांणी घेतले. मोबायल क्रांती लेगीत तांच्या वेळार सुरू जाली. गोंयांत फुडारी म्हूण आनी प्रधानमंत्री म्हूण ते खूब खेपे आयले. तांचो वावर देशवासीयांक फुडली खूब वर्सां उर्बा दितलें, अशें मुख्यमंत्री डॉ. प्रमोद सावंत हांणी सांगलें.
काँग्रेसीन सदांच ‘वोट बँके’चें राजकारण केलें. सत्तेंत रावपा खातीर घटना दुरुस्ती केली. लोकशाय आनी देशाच्या हिताचो विचार करून जनसंघाची स्थापना जाली. भारतीय जनता पक्षाचें व्हड आनी घटमूट संघटन उबारपाक वाजपेयी, अडवाणी हांचें व्हड योगदान आसा, अशें केंद्रीय मंत्री श्रीपाद नायक हांणी सांगलें. पोरण्या आनी अणभवी कार्यकर्त्यांक पक्षांत मानाची सुवात मेळटली. पोरण्यां आनी नव्या कार्यकर्त्यांमदीं संवादाचो उणाव आसा. हो उणाव पयस करपाचो वावर सुरू जाला. सर्गेस्त मनोहर पर्रीकार, श्रीपाद नायक, प्रा. लक्ष्मीकांत पार्सेकार, विश्वनाथ आर्लेकार, सतीश धोंड, सुभाष साळकार हांचें पक्षा खातीर व्हड योगदान आसा. पुडले विधानसभा वेंचणुकेत 27 आमदार वेंचून हाडपा खातीर आतां सावन वावर सुरू करपाची गरज प्रदेश अध्यक्ष दामू नायक हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
