भांगरभूंय | प्रतिनिधी
पणजीः भोमा सावन पोरणें गोंय मेरेनच्या 7 किलोमिटराच्या लांब रस्त्या खातीर केंद्रान 1060.21 कोटी रुपयां मंजूर केल्यात. केंद्रीय रस्तो येरादारी आनी म्हामार्ग मंत्री नितीन गडकरी हांणी ही म्हायती दिली. ह्या रस्त्या खातीर केंद्रान 1060.21 कोटी रुपयां मंजूर केल्ल्यान मुख्यमंत्री डॉ. प्रमोद सावंत हांणी केंद्राचे उपकार मानल्यात.
हो रस्तो अरुंद आशिल्ल्यान भोमा, कुंडय, खोर्ली हांगा सेगीत येरादारीची कोंयडी जाता. ह्या 7 किलोमिटराच्या पट्ट्याचेर वट्ट 4.275 मीटराचे इलीवेटेड कॉरीडॉर बांदतले. हो पट्टो पुराय जातकच पणजे सावन खंडेपार मेरेनचो फोर लेन रस्तो पुराय जातलो.
पणजी-बेळगांव रस्तो फोर लेन जाले उपरांत तेलंगण, आंध्र प्रदेश आनी कर्नाटक सावन गोंयांत येवपी प्रवासी आनी म्हाल येरादारी चड सुरळीत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
