भांगरभूंय | प्रतिनिधी
दिवचल : गोंय सरकारान हालींच शिरगांवचे श्री लयराई देवीचे जात्रेक दिल्ल्या राज्य उत्सव दर्ज्याक देवस्थानाचे आयतारा जाल्ले म्हाजनांचे साबार बसकेंत विरोध केलो. हो प्रस्ताव मान्य नाशिल्ल्याचें बसकेक हाजीर राविल्ल्या म्हाजनांनी सांगलें.
श्री लयराई देवस्थानाचे अध्यक्ष दीनानाथ गांवकार, भास्कर गांवकार, अतीश गांवकार, दयानंद गांवकार, वासू गांवकार, महादेव गांवकार, प्रकास गांवकार, सुभाष गांवकार हांचे हाजिरेंत जाल्ले म्हाजनांचे साबार बसकेंत वट्ट 82 म्हाजन हाजीर आशिल्ले.
दीनानाथ गांवकार हांणी सांगलें, हें देवस्तान म्हाजनी देवस्थान आशिल्ल्यान कसलोय निर्णय घेतना म्हाजनांचे बसकेंत ताका मान्यताय घेवप सक्तीचें आसा. ते नदरेन आपूण देवस्थान समितीचो ताबो घेतले उपरांत आयतारा देवस्थान सभाघरांत देवस्थानाच्या म्हाजनांची म्हत्वाची बसका जाली. ते बसकेंत सुरवेकूच देवीचे जात्रेक राज्य उत्सव दर्जो दिलपाक म्हाजनांनी विरोध केलो.
लयराईचे जात्रेक सरकार सगळे तरेचो आदार करता. कायदो सुवेवस्था, तशेंच हेर मुळाव्यो सुविधा दितना तांचो आदार हे मुखारूय ताणें असोच चालू दवरचो. खूबश्यो येवजण्यो आसात, ताका सरकाराचें अशेच तरेचो आदार अपेक्षीत आशा, अशें गांवकार हांणी सांगलें. मुख्यमंत्री डॉ. प्रमोद सावंत हांणी हालींच लयराई देवस्थानाचे जात्रेक राज्य उत्सव म्हूण मान्यताय दितना थंय साबार सुविधा दितले अशी घोशणा केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
