भांगरभूंय | प्रतिनिधी
मंत्रीमंडळ बदल, गोंय विधानसभा, पंचायत, जिल्लो पंचायत, पणजी म्हापालिका वेंचणूक, नगरपालिका वेंचणुकेंत देंवचे पयलीं अस्तुरेचीय परिक्षा आसतली. 33 टक्के पंचायत, जिल्लो पंचायत, नगरपालिका, म्हापालिकेंतल्यान विधानसभे मेरेन पावपापासत सेमी फायनल, परिक्षा आसा. ते खातीर अस्तुरीनीत सगल्या राजकी पक्षांनी पक्ष पावंड्याचेर थारावची पडटली.
2027 विधानसभा वेंचणुकेंतल्यान 12 नारी न्हय चिंगारी गोंय विधानसभे मेरेन पावपाकच जाय ही मोख राजकी पक्षांची आसची. पक्ष समित्यो, लोकप्रतिनिधी, गांव ते घर पावंड्यार तेखातीर मानसिकता घडोवपाक राजकारण्यांनी तिका बराबरीन घेवचें. घरांतल्यान तो आरंभ केल्यार ती फाटीं कशी उरतली? तीच तर खरी स्त्रीशक्ती सगलें वेवस्थीत करून घेवपाक आदार दितली, ताचो पालव घेवन तिका राजकी जैता कडेन वचपाचें आसा.
33 टक्क्यांचो आरंभ गोंयांतय तिचे खातीर जालो नगरपालिका, पंचायत, जिल्लो पंचायतींतल्यान. त्याच 33 टक्क्यांचेर ती 50 टक्केमेरेन पंचायत, नगरपालिकेंत पावपाक शिकल्या, शिकतली. तिचे आड ती अशें झुज 2027 त विधानसभा वेंचणुकेंतय दिसतलें. झुजांत एकामेकांक दुखोवप ना हें मना काळजाक सांगचें पडटलें.
भाजपान फाटले लोकसभा वेंचणुकेंत अस्तुरीशक्तीची तांक जोखली. ती जिखून येवंक शकता हो विश्वास तें वेंचणुकेंतल्यान तिका, पक्षाक मेळ्ळा. विश्वासाची भयण विद्या, लक्ष्मी जळींमळीं आसतल्यो. तांकां सोदून काडपाक राजकी इत्साशक्त गरजेची. ताच्या फाटल्यान, बराबरीन ती जेन्ना दिसतली तेन्नाच 33 टक्क्यांक खरो अर्थ येतलो. 2027 त विधानसभा वेंचणुकेंत तिच्या राजकारणाक, तिकाय म्हत्व आसा.
नाका असलें राजकारण चलपाचें, दिल्ली ते गल्ली भोंवपाचें, ताच्या बराबरीन फुडें वतना थोमणे आयकुपाचें, धुकल्ल्यार, पडल्यार सांबाळपाचें अशें म्हणप कुशीक दवरुया.
ती अन्नपूर्णा, स्वयंपूर्णा, आप मजत गटांत, प्रशासनात, थळावे स्वराजनितींत, विधानसभेंत राज्यांत आसा. खंयचेंच मळ तिका पयस उरुंक ना. त्या मळांनी मेळयल्लें जैत रात दीस केल्ल्या वावरांतल्यान तिची धिटाय.
दर एका मळार फुडें सरपाक तिका सर्तींत देंवचें पडटा, पडटलें. तिचे आनी ताचे बराबरीन. 2027 त आपूण फाटीं रावची ना हें दाखोवन दिवचें पडटलें. राजकी पक्षांनी पक्षाच्या पावंड्यार समित्यांनी सुवात दिल्यार राजकारण तिका लागसल्ल्यान कळटलें. जापसालदारकी घेवपाची तिचीय तयारी आसची पडटली.
एकादरे ताचेबराबरीन घरकान्न येतली. तेन्ना भयण, भावजय, नणंद, जाव, धुवां भितल्ले राजरंग पळोवंक मेळटले. तीच तर फुडाराची राजनीत आनी राजनीती.
काल ती झाँसीची राणी आशिल्ली, आयज ती तश्शी आसपाची, दिसपाची गरज ना, तिची निती ताचे तिचेआड झुजपाची आसल्यार पुरो. झुजतना तिकाय सांबाळचें पडटलें, आनी भेसा कडेन पळोवचें पडटलें. ताच्या प्रचाराक ताका, तिका वचचें पडटलें, तिच्या प्रचारांत तोय वांटेकार आसतलो. घरान घर तिचे खातीर तो भोंवतलो, ताचेखातीर ती भोंवतली. एकादरे तो फुडें गेलो जाल्यार तिका घर आनी घरच्यांक सांबाळपाक तयार रावचें पडटलें. ती मुखार गेल्यार ताणे घर, घरच्यांक वेवसाय, धंदो, नोकरी, उद्येग, भुरग्यांक राखण दिवपाक शिकचें पडटलें. राजकी विज्ञान, समाजशास्त्र ते नदरेंतल्यान बांदपाक राश्ट्रीय अस्तुरी आयोग म्हत्वाचो. आयोगाच्या आदारान राजकी अस्तुरीनीत बांदली, तिका कायद्याचें रुप मेळ्ळें, कायदे चालीक लागले तरी गुन्यांव कशे सोंपतले? गुन्यांव करतल्यांक बंदखणींतय शिकोवप, उद्येग, वेवसाय बांदप, अर्थिक बळगें मेळोवप हेंच फुडाराचें चित्र.
समाजकारण तें राजकारण आनी राजकारण तें समाजकारण हे व्हड पावंडे. पावंड्या पावंड्यार आडमेळीं आशिल्लीं, आसतलीं. बरें वायट, रुपें, तिखें, भांगर, वज्रांतल्यान तिची अर्थिक, उलोवपाची, कायद्याची तांक तिका राजकारणांत, समाजकारणांत भरसूंक, पावोवपाक गरजेची.
दोन भावांच्या राजकारणांत, तांकां उंचायेर पावोवंक तिचो व्हड वांटो, आतां तिका विधानसभेर धाडपाचो सोपूत घेवया. एक पणटी पेटोवन गोंयच्यान वाट दाखोवया. ज्येश्ठांनी मार्गदर्शी जावन ल्हानाक व्हड करपाचो होच वगत, गिन्यांनी तातूंतल्यान मेळटले, गोंय गिन्यानाची शक्त जातलें.
अस्तुरेची राजकी मळा खातीर कॅपेसिटी बिल्डिंग – क्षमेतेची बांदावळ थळाव्या राजकारण्यांनी, ज्येश्ठांनी आदीं करची, जोड राश्ट्रीय फुडाऱ्यांची मेळची. बापायचें राजकारण पळोवन, जोखून भुरगीं शिकलीं तरी तीं राजकारणी जातलीं अशें न्हय. तांची विचारशक्त जेन्ना न्हयकारात्मक जाता तेन्ना सकारात्मक जावपाक अस्तुरी, अस्तुरीनीत येता. गोंयची पयली, आयज मेरेनची एकलीच अस्तुरी मुख्यमंत्री शशिकला काकोडकार. ती ताई, ती आदर्श, ती झुजारी, बेस बरी कोंकणी उलोवपी बापाय वरी. मन मेकळें करुन हेरां बराबरीन च्या घेवपी, भाशणां आयकुपी. तिची प्रशासन- नीत यादींतली.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
