भांगरभूंय | प्रतिनिधी
खानापूर : विटो तयार करपा खातीर उडयिल्ले मातयेचे राशीर खेळटना हात हाय वोल्टेज वायरीक लागिल्ल्यान मनाली मारुती चोपडे (९) ह्या सानुल्याक मरण आयलें. ही घडणूक इदलहोंड, खानापूरा बुधवारा सांजेवेळार सुमार ५.४५ वरांचेर घडली.
मेळिल्ले चड म्हायती प्रमाण, मारुती चोपडे हांच्या घरा कुशीकूच एका वीट भट्टी धनयान विटो तयार करपा खातीर माती साठयल्या. मातयेची व्हडली रास जाल्या. हे मातये वयरूच हेस्कॉम खात्याच्यो हाय वोल्टेज सरयो गेल्यात. काल यत्ता तिसरेंत शिकपी मनाली आनी चार ल्हान भुरगीं खेळपा खातीर मातयेचे राशीर चडिल्लीं. मजगतीं, खेळटना तिचो तोल गेल्ल्यान तिणें लागींच आशिल्ल्या लायटीचे सरयेक धरलें. लायटीचो खर झटको लागिल्ल्यान तिका जाग्यारूच मरण आयलें. हे घडणुकेंत एक ल्हान भुरगोय जखमी जालो. ताचेर सध्या खानापूराच्या सरकारी हॉस्पिटलांत उपचार सुरू आसात.
मजगतीं, पुलिसांनी तपास सुरू केलो तेन्ना वीटभट्टी धनयाची चूक उक्ताडार आयली. हेस्कॉम खात्याच्या लोकांनी वीटभट्टी धनयाक मातयेची रास काडची म्हणून जायते खेपो सांगिल्लें. मात धनयान तीं काडूंक नाशिल्ली. हाका लागून एके सानुले चलयेक मरण आयलें.
मजगतीं हे घडणुकेची नोंद खानापूर पुलीस स्टेशनांत जाली. फुडलो तपास सुरू आसा. वीटभट्टी धनी ही घडणूक घडटांच फरारी आशिल्ल्याचें समजता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
