भांगरभूंय | प्रतिनिधी
पणजी : नानोस्करवाडो, हरमला रातच्या वेळार सुणें व्हरपी तो बिबटो निमाणो रान खात्याच्या कर्मचार्यांनी लायिल्ल्या पांजऱ्यांत आडकलो. एका वर्साच्या ह्या बिबट्याची वैजकी तपासणी करून, मुखेल रानजीव संरक्षकांचे परवानगेन ताका रानांत सोडटले, अशी म्हायती मुखार आयल्या.
फाटल्या, २९ मार्चाक, मधलावाडो-हरमल, पेडण्यां रातच्या वेळार बिबट्याचो वावर आशिल्ल्याचें उक्ताडार आयिल्ल्यान ह्या वाठारांत भंयाचें वातावरण निर्माण जाल्लें. शेनवारा मध्यान रातीक सुमार अडेज वरांचेर ह्या बिबट्यान मार्सेलीन फर्नांडीस हिच्या पोशिल्ल्या सुण्याक व्हेल्लो. हे सगळें सिसीटीव्ही कॅमेर्यांत कैद जाले उपरांत मार्सेलीन हांणी हुस्को उक्तायिल्लो.
सुण्याक नेमको कसो व्हेलो?
मध्यानरातीं सुमार अडेजांक सावजाच्या सोदांत भायर सरिल्ल्या बिबट्यान फर्नांडीस हांच्या घरा मुखारचे गेटी वेल्यान सरळ आंगणांत उडी मारली. उपरांत बांदून दवरिल्ल्या सुण्याचेर घुरी घाली आनी ताका उखलून रानांत पळ काडलो. ह्या वेळार सुणो भोंकिल्ल्यान फर्नांडीस कुटूंब न्हिदेंतल्यान जागें जालें. तांणी भायर येवन पळयल्यार थंय सुणो दिसूंक ना. कांय वेळ आंगणांत रावन तांणी सुण्याची वाट पळयली. उपरांत सीसीटीव्ही फुटेज तपासली तेन्ना बिबट्यान ताका व्हेल्ल्याचें लक्षांत आयलें.
मजगतीं ह्या कुटुंबान रान अधिकार्यांक जाल्ले गजालीची म्हायती दिली. अधिकार्यांनी सकाळीं हे सुवातेर भेट दिवन ताची पळोवणी केली. ते सुवाते वेल्यान रान वाठार लागींच आशिल्ल्यान बिबटो थंयच्यान आयला आसतलो असो अदमास अधिकार्यांनी उक्तायलो. उपरांत ताका धरपा खातीर थंय विवीध सुवातांचेर पांजरे घाले.
नानोस्करवाडो वाठारांतय बिबटो भोंवतना दिशिल्लो. तो बिबटो होच आसतलो असो अदमास थळाव्यांनी उक्तायल्लो. उपरांत रान खात्यान बिबट्याक धरपा खातीर पांजरो दवरलो. हालींच्या काळांत चणईवाडो वाठारांत रातच्या वेळार सुणे नेटान भोंकताले. मात सध्या भोंकप सोडाच, हेडगीं सुणीं उणीं जाल्ल्याचें दिसून आयिल्ल्याची म्हायती एका नागरिकान दिली. बिबट्याच्या भंयाक लागून हांगा शांतिकाय पातळ्ळ्या. रान खात्यान हरमला ह्या बिबट्याक धरपा खातीर पावलां उबारिल्ल्यान थळाव्यांनी समादान उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
