भांगरभूंय | प्रतिनिधी
१२ वरांचे चर्चे उपरांत जालें मतदान!
नवी दिल्ली, खबरां संस्था: केंद्रीय अल्पसंख्यांक मंत्री किरेन रिजिजू हांणी काल (बुधवारा) संसदेंत वक्फ दुरूस्ती विधेयक सादर केल्लें. उपरांत काल दनपार १२ वरां सावन रात मेरेन ह्या विधेयकाचेर सभाघरांत चर्चा जाली. हातूंत सत्ताधारी खासदारांनी विधेयकाच्या वटेन मतां उक्तायलीं. जाल्यार विरोधकांनी हाका नेटान विरोध केल्ल्याचें पळोवपाक मेळ्ळें.
विधेयक लोकसभेंत मंजूर
काल रातीं जाल्ल्या मतदाना उपरांत वक्फ दुरूस्ती विधेयक लोकसभेंत मंजूर जालें. ह्या वेळार विधेयकांचे वटेन २८८ मतां पडली. जाल्यार, विरोधांत २३२ मतां पडली. मजगतीं वक्फ दुरूस्ती विधेयकावेल्या मतदानाक प्रधानमंत्री नरेंद्र मोदी हजर रावूंक ना.
अमित शाह हांणी कितें म्हणलें?
संसदेंत वक्फ विधेयकाचेर चर्चे मजगतीं, केंद्रीय गृहमंत्री अमित शहा हांणी पुराय तांकीन ताचें समर्थन केलें. तांणी म्हणलें, म्हज्या मंत्रीमंडळांतल्या सहकार्यान मांडिल्ल्या विधेयकाक हांव तेंको दितां. दनपरां १२ वरां सावन सुरू आशिल्ली चर्चा हांव लक्ष दिवन आयकतां.
वफ्क दुरूस्ती विधेयकाचेर उलयतना तांणी मुखार म्हणलें, महाराष्ट्रांतल्या कोल्हापूर जिल्ह्यांतल्या वडणगे गांवांतल्या महादेव देवळाचेर वक्फ बोर्डान दावो केल्लो. हाचे वांगडा बीडच्या कंकालेश्वर देवळाची १२ एकर जमीन वक्फ बोर्डान बळयां ताब्यांत घेतिल्ली.
भारताक मुस्लीम राष्ट्र करपाचें आसा?
मजगतीं विधेयकावेले चर्चे वेळार भाजपा खासदार निशिकांत दुबे हांणी आदल्या वक्फ विधेयका आड खर भुमिका मांडली. तांणी म्हणलें, १९५४ वर्सा संसदेच्या वांगड्यांनी विधेयकाक विरोध करूनय, कॉंग्रेस पक्षान मुस्लिमांक खुश करपा खातीर वक्फ कायदो मंजूर केलो. वक्फाक हेर खंयच्याच देशांत अशे अधिकार दिवंक ना, तुमकां भारताक मुस्लीम राष्ट्र करपाचें आसा?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
