भांगरभूंय | प्रतिनिधी
पणजीः शिक्षण रिणाच्या जुरांचेर अनुदान दिवपी डॉ. आंबेडकर येवजणेचो फाटल्या पांच वर्सांत १८ गोंयकारांनी लाव घेतलो आनी तांचे खातीर १५ लाख परस निधी केंद्र सरकारान खर्च केला. मागास वर्गीय आनी अर्थीक मागास वर्गीयां खातीर ही येवजण चालीक लायल्या, अशी म्हायती सामाजीक न्याय आनी सशक्तीकरण राज्य मंत्री रामदास आठवले हांणी दिल्या.
राज्यसभेच्या पटलार लेखी जापेंत आठवले हांणी सांगलें, मागास आनी अर्थीक मागास आशिल्ल्या लोकां खातीर मंत्रालय डॉ. आंबेडकर येवजण चालीक लायता. हे श्रेणीतले गरजू भुरगे जांणी देशा भायर वचून शिक्षण घेवपा खातीर रीण काडलां त्या रिणाच्या जुराचेर सवलत दिवपा खातीर हे येवजणेंतल्यान अनुदान मेळटा.
हे येवजणे खातीर मंत्रालयान बँके वांगडा समजूतकायेची कबलात केल्या आनी बँको हे येवजणेची अंमलबजावणी करतात. पदव्युत्तर, एम फिल वा पीएचडी पांवड्यावेल्या शिक्षणा खातीरूच विद्यार्थ्यांनी प्रवेश घेतल्यार ते येवजणेक पात्र थारतात. अर्जदारान अधुसुचीत बँकेंतल्यान शिक्षण खातीरचें रिण काडचें. तशेंच ताची वर्सुकी येणवाळ ८ लाख परस चड आशची न्हय. तशेंच लावार्थ्यांन चडांत चड २० लाख मेरेनचें रीण काडप गरजेेचें, अश्यो हे येवजणेच्यो अटी आसात.
राज्यांत हे येवजणेचो १८ जाणांनी लाव घेवन तांकां रिणाच्या जुरांत सवलत दिवपा खातीर केंद्रान १५,८६,०१३ इतलो नीधी खर्च केला. मात फाटलीं चार वर्सां हे येवजणे खातीरची मागणी सेगीत देंवत आयल्या.
अर्थीक २०१९-२० वसार ५ जाणांनी लाव घेवन तांकां १.६३ लाख मेरेन अनुदान मेळिल्लें, २०२०-२१ वर्सा ५ लावार्थ्यांक ४.३८ लाख, २०२१-२२ वर्सा ६ लावार्थ्यांक ५.५३ लाख, २०२२-२३ वर्सा एक लावार्थ्यांक २.२६ लाख आनी वर्स २०२३-२४त एकल्यान हे येवजणेचो लाव घेवन २.०५ लाख मेरेन अनुदान फावो जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
