भांगरभूंय | प्रतिनिधी
नवी दिल्ली, खबरां संस्था ः संवसारीक पांवड्यार वावुरपी जायत्यो संस्था वेगवेगळ्या प्रस्नांचेर निरिक्षण करतात आनी वेळोवेळ ताचेर अहवाल सादर करतात. एका अहवालान देशांत वाडत वचपी मुस्लीम लोकसंख्ये कडेन लक्ष ओडलां. सध्या अमेरिकन संशोधन कंपनी प्यू रिसर्चान (Pew Research) सुमार एक दशका आदीं म्हणल्यार 2015 वर्सा सादर केल्ल्या अशाच अहवालाचो संदर्भ दिता.
प्यू रिसर्चाच्या म्हणण्या प्रमाण, 2050 मेरेन भारतांत सगळ्यांत चड मुस्लीम लोकसंख्या आसतली असो अदमास आशिल्लो. अहवाला प्रमाण 2050 मेरेन भारताची वट्ट लोकसंख्या 166 अब्ज जातली, तातूंतली हिंदू लोकसंख्या 1.3 अब्ज, जाल्यार मुस्लीम लोकसंख्या 31 कोटी मेरेन पावूं येता. म्हत्वाचें म्हणल्यार संवसारांतल्या सगळ्यांत चड लोकसंख्या आशिल्ल्या देशांमदीं भारताचोय आस्पाव आसून लोकसंख्येचो 11 टक्के वाठार भारतान व्यापलां अशें सांगतात.
सध्या इंडोनेशियांत संवसारांतली सगळ्यांत चड मुस्लीम लोकसंख्या आसली तरी प्यू रिसर्चाच्या मतान 2050 मेरेन भारतांत मुस्लीमांची लोकसंख्या वाटडली. हाचो अर्थ देशांतली सरासरी मुस्लीम लोकसंख्या 7 पटींनी वाडटली.
फाटल्या दशकांत लोकसंख्येंत नेटान वाड…
2001 ते 2011 ह्या दशकांत भारताची वट्ट लोकसंख्या सरासरी 17.7 टक्क्यांनी वाडली अशें अहवालांत स्पश्ट केलां. हातूंत मुस्लीम लोकसंख्येंत 25 टक्क्यांनी, जाल्यार हिंदू लोकसंख्येंत 17 टक्क्यांनी वाड जाली. 1951 ते 2011 मेरेन देशांतली मुस्लीम लोकसंख्या 386 टक्क्यांनी वाडून हो आंकडो 3.54 कोटी वेल्यान 17.22 कोटी र पावलो. हिंदू लोकसंख्या तुळेन उण्या प्रमाणांत म्हणल्यार 218 टक्क्यांनी वाडली. आंकडेवारी प्रमाण ही वाड 30.35 कोटी वेल्यान 96.62 कोटीर पावल्या. शीख लोकसंख्येंत 235 टक्के आनी क्रिस्तांव लोकसंख्येंत 232 टक्के वाड जाली.
लोकसंख्येची वाड आनी प्रजनन दर
वाडीचो दर पळयल्यार हातूंत मुस्लीम लोकसंख्येचो व्हड वांटो आसा हें स्पश्ट जाता. 1992 ते 93 ह्या काळांत हिंदू बायलांचें प्रजनन प्रमाण 3.3 आशिल्लें. जाल्यार मुस्लीम बायलांचें प्रजनन प्रमाण 4.4 आशिल्लें. 2022 वर्सा हिंदू बायलां मदीं प्रजनन दर 1.9 मेरेन पावलो, जाल्यार मुस्लीम बायलां मदीं प्रजनन दर 2.3 मेरेन थीर जालो. फाटलीं 30 वर्सांचे प्रमाण पळयल्यार मुस्लीम बायलां मदीं प्रजनन दर 47 टक्क्यांनी उणो जालां, जाल्यार हिंदू बायलां मदीं 42 टक्क्यांनी उणो जालां अशें अहवालांतल्यान कळटां.
संवसारीक पांवड्यार मुस्लीम लोकसंख्या पळयल्यार ती 800 कोटी मेरेन पावता. संवसारांतल्या सुमार 57 देशांतले नागरिक इस्लाम धर्म पाळटात अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
