भांगरभूंय | प्रतिनिधी
तेलंगण, खबरां संस्था: हैदराबादच्या देवळांत दर्शना खातीर गेल्ले एके बायलेचेर सात जाणांनी सामुहीक बलात्कार घडलो. शेनवारा रातीं उसरां ही घडणूक घडली. हाका लागून ह्या वाठारांत तणावाचें वातावरण निर्माण जालां. देवूळ वाठाराच्या लागींच ही घडणूक घडल्या. हे विशीं तेलंगण पुलिसांनी पिडेस्त बायलेचे कागाळी वेल्यान सात जाणां आड गुन्यांव दाखल केला. तांकां ताब्यांत घेतल्यात.
नेमकें कितें घडलें?
शेनवारा सांजेवेळार पिडेस्त बायल तिच्या एका सोयर्या वांगडा उरकोंडापेटा गांवांतल्या देवळांत दर्शना खातीर गेल्ली. उपरांत तीं दोगांय देवळाच्या वाठारांत कांय वेळ रावलीं. मजगतीं ती बायल सैमीक विधी खातीर गेली तेन्ना थंयच्यान आरोपी टोळयेन बायलेक एके सुवातेर व्हेली. थंय तिचेर त्या सातूय जाणांनी बलात्कार केलो. ह्या वेळार ते बायलेच्या सोयर्यान तिका वाटोवपाचो यत्न केलो. तेन्ना ताका एका झाडाक बांदून दवरलो.
पुलिसांनी दिल्ले म्हायती प्रमाण, पिडेस्त बायलेन दुसर्या दिसा पुलिशेंत कागाळ दाखल केली. हे कागाळीच्या आदाराचेर पुलिसांनी तपास सुरू केलो आनी वट्ट ७ जाणांक ताब्यात घेतलें. हातूंत एक इलेक्ट्रिशियन, एक रिक्षाचालक आनी दोन रांदप्यांचो आसपाव आसा. ह्या चवगांचेर खंडणीचेय गुन्यांव आसात.
राज्य महिला आयोगान घेतली दखल
मजगतीं, नागरकुर्नूल जिल्लो आनी हैदराबादांतूय फाटल्या कांय दिसांनी बलात्काराच्या घडणुकांनी वाड दिसून आयली. ह्या प्रकाराची गंभीर दखल राज्य महिला आयोगान घेतली. हे विशीं पुलीस अधिकार्यांक खर लक्ष घालपाचे निर्देश आयोगान दिल्यात. बलात्काराच्या प्रकरणांत पिडेस्त बायलांचे भलायकेची आयोगान विशेश दखल घेता. पिडेस्तांक योग्य उपचार मेळचे आनी आरोपींक खर ख्यास्त जावची, अश्यो सुचवण्यो आयोगान पुलीस विभागाक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
