भांगरभूंय | प्रतिनिधी
येजमान वॅस्ट इंडीजा आडचे पयले वन डे मॅचींत भारतान टॉस हारल्या उपरांत पयलीं बॅटींग करतना निर्धारीत 50 ओव्हरींनी 7 विकेटी वगडावन 308 धांवड्यो केल्यो.
मुखेली आनी ओपनर शिखर धवनाक तीन धांवड्यांनी शेंकडो चुकलो. जाल्यार शुभमन गिल आनी श्रेयश अय्यर हाणें अर्द शेंकड्यांची खेळी केली.
धवन आनी गिल हांणी भारताक उत्कृश्ठ सुरवात करून दिली. दोगांयनी पयले विकेटी खातीर 119 धांवड्यांची भागिदारी केली. सुरवातीक धवन परस गिलान आक्रमक बॅटींग केली. ईशान किशन आनी ऋतुराज गायकवाड हे डावाची सुरवात करपाचे सर्तींत आसतना पंगड वेवस्थापनान गिलाक डावाची सुरवात करपाची संद दिली. ताणें मेळिल्ले संदीचें भांगर केलें. ताणें 53 बॉलांनी स चवके आनी दोन सक्यांचे मजतीन 64 धांवड्यांची खेळी केली.
गिल बाद जाल्या उपरांत धवनान धांवगती वाडयली. ह्या वेळार ताका अय्यराची साथ मेळ्ळी. दोगांयनी दुसरे विकेटी खातीर 94 धांवड्यांची भागिदारी केली. धवन शेंकडो पुर्ण करतलो अशें दिशिल्लें. पूण, तो 97चेर बाद जालो. ताणें 10 चवके आनी तीन सके मारले. धवन बाद जाल्या उपरांत अय्यरूय बाद जालो. अय्यरान 54 धांवड्यो केल्यो.
अय्यर बाद जाल्या उपरांत भारताच्या एकाय बॅट्समनाक व्हड खेळी करपाक जमली ना. ताका लागून भारताक 350 मेरेन मजल मारप शक्य जालें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
