भांगरभूंय | प्रतिनिधी
पणजीः फाटल्या वर्सा 1 एप्रीलाचे तुळेन राज्यांतल्या स धरणांतल्या पांच धरणांनी अंदूं उदकाचो सांठो चड आसा. राज्यांतल्या साळावली, अंजूणें, चापोली, पंचवाडी, गावणें धरणांत फाटल्या वर्सा परस चड उदका सांठो अासा. आमठाणें धरणांत उदकाचो सांठो फाटल्या वर्सा परस उणो आसा. ही म्हायती उदका स्रोत खात्या कडल्यान मेळ्ळ्या. फाटल्या वर्सा पावसाळ्यांत विक्रमी पावस पडलो. हाका लागून धरणांत अजूनय फावो तो उदक सांठो आसा. पूण एप्रील आनी मे म्हयन्यांत उश्णतायेक लागून उदकाची मागणी वाडपाची शक्यताय आसा.
मेळिल्ले म्हायती प्रमाण, 1 एप्रील 2024 दिसा दक्षीण गोंयची तान भावोगवपी साळावली धरणांत 49.65 टक्के उदका सांठो आसा. 1 एप्रील 2025 मेरेन ह्या धरणांतलो 58.7 टक्के उदका सांठो उरला. अंजूणें धरणांत फाटल्या वर्सा फक्त 40.84 टक्के उदका सांठो आशिल्लो. अंदूं 1 एप्रील मेरेन 44 टक्के उदकाचो सांठो अंजूण्यां उरला. फाटल्या वर्सा गावणें धरणांतल्या उदकाचो सांठो 57.14 टक्के उरिल्लो, जाल्यार अंदूं 66.3 टक्के उदक उरलां. फाटल्या वर्सा 39.91 टक्के उदकाचो सांठो पंचवाडींत उरलो. अंदूं धरणांत 44.7 टक्के उदका सांठो आसा.
मेळिल्ले म्हायती प्रमाण, राज्यांतल्या स धरणांतल्यान आमठाणें धरणांत उदकाचो सांठो सगल्यांत उणो आसा. फाटल्या वर्सा 1 एप्रीलाक आमठाणें धरणाची उदकाची पातळी 38.29 टक्के आशिल्ली. म्हणल्यार अंदूं 1 एप्रीलाचे निमाणें मेरेन आमठाणेंत 31.6 टक्के उदकाचो सांठो आसा. उत्तर गोंयाक उदका पुरवण करपी तिळारी धरणाची तांक 46,217 हॅक्टर मिटर आसा, तातूंतले 17,793 हॅक्टर मिटर 1 एप्रील 2025 च्या निमाणें मेरेन उपलब्ध जातलें. (38.5 टक्के) उदकाचो सांठो उरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
