भांगरभूंय | प्रतिनिधी
स्मार्ट सिटीचीं ९० टक्के कामां पुराय, डेडलायन पाळ्ळ्या
पणजी: सेंट्रल ड्रेनेजीक लागून (मध्यवर्ती गटार यंत्रणां) पणजेचो १८ जून रस्तो, आत्माराम बोरकर रस्तो आनी पिसुर्लेकर रस्त्याचें काम स्मार्ट सीटी खाला करपाक मेळचें ना. सरकाराक हे विशीं कळयलां. स्मार्ट सीटीचीं ९० टक्के कामां पुराय जाल्यांत. न्यायालयाक सादर केल्ल्या प्रतिज्ञापत्रा प्रमाण रस्त्यांचीं कामां ३१ मार्च मेरेन पुराय जाल्यांत, अशी म्हायती इमेजीन स्मार्ट सीटीचे मुखेल कार्यकारी अधिकारी संजित रॉड्रिग्स हांणी दिली.
स्मार्ट सीटी खाला सुरू आशिल्लीं कामां आनी डेडलायनची म्हायती स्मार्ट सीटीचे मुखेल कार्यकारी अधिकारी संजित रॉड्रिग्स हांणी पत्रकार परिशदेंत दिली.
एका याचिके प्रकरणांत स्मार्ट सीटी वतीन २७ जानेवारीक प्रतिज्ञापत्र सादर केल्लें. हातूंत कामाच्या डेडलायनचें पालन स्मार्ट सीटी वतीन जालां. सांत इनेज आनी कॅफे भोसले चौकांतल्या रस्त्यांचीं कामां ३१ मार्च मेरेन पुराय करपाची डेडलायन आशिल्ली. ते प्रमाण कामां पुराय जाल्यांत. रंगकाम, सायनेज, बिटामिनचो थर तशेंच कांय बारीक सारीक कामां ३१ मे मेरेन पुराय करतले. पुराय जाल्ल्या रस्त्यांचें क्युरींग जाले बगर कांय कामां पुराय करपाक मेळचीं ना, हाका लागून कळाव जाला. झाडां लावपा वांगडा लँडस्केपिंगचें काम ३१ मे २०२५ मेरेन पुराय करतले.
ताड माड : वडाचें झाड आनी घुमटी सुरक्षीत
ताड माड हांगचें वडाचें झाड आनी घुमटेक कसलेच तरेचो धोको ना. हो रस्तो २०० मिटर लांब आसा. २०० मिटर मदल्या १२० मिटर रस्त्याचें काम पुराय जालां. रस्त्या सकयल उदक आशिल्ल्यान कामाला कळाव जाता. उदक काडपा खातीर ८० बोर वेल खणल्यात. घाणयार्या उदकाची पायपलायन बरीच खोल आसा. हाका लागून कामाक कळाव जाता, अशें संजित रॉड्रिग्स हांणी सांगलें. रायबंदरच्या फेरीबोटीच्या रॅम्पचें काम थारिल्ले प्रमाण पुराय जालां. हो रॅम्प न्हंय परीवहन खात्याच्या ताब्यांत दितले.
पणजे फाटलीं ५० वर्सां जीं कामां जावंक नाशिल्लीं तीं कामां आतां जाल्यांत. तोंकार २०० मीमी व्यासाची उदकाचीं पायपां आशिल्लीं. हीं आतां ७५० मीमी व्यासाचीं घातल्यांत. पयल्या टप्प्यांतलीं कामां १८ जानेवारी मेरेन, दुसर्या टप्प्यांतलीं कामां ७ फेब्रुवारी मेरेन, तिसर्या टप्प्यांतलीं कामां २८ फेब्रुवारी मेरेन जाल्यार चोवथ्या टप्प्यांतलीं कामां ३१ मार्च मेरेन पुराय केलीं. प्रतिज्ञापत्रांतल्या डेडलायनी प्रमाण कामां पुराय जाल्यांत.
जयराम कॉम्प्लेक्स ते रूआ दे ओरेम ही पायपलायन बदलपा खातीर कंत्राटदार मेळनाशिल्ल्यान ह्या रस्त्याचें काम पुराय करपाक आडमेळीं येतात. रस्ते तशेंच गटार यंत्रणेचीं ९० टक्के कामां पुराय जाल्यांत. १८ जून, आत्माराम बोरकर आनी पिसुर्लेकर रस्त्याचीं कामां भौशीक बांदकाम खात्या वतीन करतले. ह्या कामांची स्वतंत्र निविदा भौशीक बांधकाम खात्या वतीन जारी करतले, अशें स्मार्ट सीटीचे सीईओ संजित रॉड्रिग्स हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
