भांगरभूंय | प्रतिनिधी
डाॅ. सावंत : कारापूर- सर्वण पंचायतीचे इमारतीचें उक्तावण
दिवचल: केंद्र आनी राज्य सरकारान फाटलीं धा वर्सां देश तशेंच गोंयची उदगत केली. फाटलीं पन्नास वर्सां जें शक्य जावंक ना तें धा वर्सांनी भाजप सरकारान साध्य करून उदरगतीक गती दिल्या. गांवगिर्या वाठारांतल्या दरेका गांवाची उदरगत जावप हें म्हजें सपन. गोंयच्या लोकांक तशेंच दरेका घराक केंद्र आनी राज्याच्या येवजण्यांचो लाव मेळचो म्हूण पंचायत वांगड्यांनी कार्यरत रावचें. कोयर वेवस्थे कडेन आडनदर जाल्ल्यान योग्य ती कारवाय करतले, अशें मुख्यमंत्री डॉ. प्रमोद सावंत हांणी सांगलें.
कारापूर- सर्वण पंचायतीच्या इमारतीच्या उक्तावणा वेळार डॉ. सावंत, आमदार प्रेमेंद्र शेट, सरपंच तन्वी सावंत, उपसरपंच दिव्या नायक, अपर्णादेवी राणे, जिल्लो वांगडी महेश सावंत, गट विकास अधिकारी ओंकार मांद्रेंकार, पंच दामोदर गुरव, सचीव महादेव नायक, तशेंच हेर पंच वांगडी हजर आशिल्ले.
सरकार गांवचे उदरगती खातीर कोट्यांनी रुपया खर्च करता. कारापूर भागांत शेती खातीर उदक उपलब्ध केलां. मात ते सुवातेर जायत्या वाठारांनी प्लास्टिकाचो थर दिसता. तशेंच खुबशे कडेन कोयर भौशीक सुवातांचेर पडिल्ल्यान पंचायत मंडळ, पंचायत वांगड्यांनी त्या कोयराची जापसालदारकी घेवप गरजेचें. जे कोयर करतात तांचेर कारवाय करप गरजेचें आशिल्ल्यान सरकार हे विशीं चड गंभीर आशिल्ल्याचें मुख्यमंत्र्यान सांगलें.
स्वयंपूर्ण गोंय करपाचें आसल्यार विवीध खात्यांतल्या सरकारी कर्मचार्यांनी समाजीक भान दवरून काम करप गरजेचें. दुर्दैवान कांय खात्यांतले कर्मचारी कामूच करिनात. ताचो तपशील आमी एकठांय केल्ल्यान आतां तरी सुधारात आनी जनते खातीर काम करात. गरज पडल्यार लोकांच्या घरा वचून तांकां मजत करात. मात कामार असलीं आळशेपणां सोंसून घेवचो ना, अशी खर भुमिका तांणी घेतली. उदरगत करतना दरेक गांव नितळ, सुंदर राखप, पडींग जमनीची लागवड करून, स्वयंपूर्णतेचे दिकेन चलप गरजेचें आसा. सगल्या पंचायतींनी एक जावन आपापल्या गांवचो आराखडो तयार करतना नितळ गांवगिरो वाठारा नितळ करपाची जापसालदारकी दरेका पंचान घेवची, असो उलो तांणी मारलो.
प्लास्टीक मुक्त कोयर, मुक्त गांव करपा खातीर सगल्यांनी सहकार्य करचें. गटारां बांदपाक पयशे वगडावचे न्हय. तशेंच लोकांक उपेगी पडपी प्रकल्प उबारात अणें मुख्यमंत्र्यान सांगलें.
आमदार प्रेमेंद्र शेट हांणी सांगलें : उदरगतीक गती दीत सगल्याच वाठारांनी वीज, उदक, रस्ते, जमनी पोंदच्यान सरयो अशे तरेच्या जायत्या सुविधां खातीर कोटींची तरतूद केल्ल्याचें सांगलें. कारापूर व्हड खंळां संकुल उबारतले अशेंय तांणी म्हणलें. कोळंमं तळें पर्यटन केंद्र म्हणून विकसीत करतले अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
