भांगरभूंय | प्रतिनिधी
डॉ. प्रमोद सावंत हांणी हालींच गोंयचे मुख्यमंत्री म्हूण स वर्सां पुराय केल्यांत. डॉ. प्रमोद सावंत हांचे राजकी गुरू सर्गेस्त मनोहर पर्रीकार हांकां जें जमलें ना तें तांणी साद्य केलें. स. मनोहर पर्रीकार एक दोन फावटी न्हय जाल्यार चार फावटी गोंयचे मुख्यमंत्री जाले. पूण सेगीत एखादो टर्म वा पांच वर्सां ह्या पदार रावपाची वा मुख्यमंत्री म्हूण काम करपाची संद तांकां नियतीन दिली ना. डॉ. प्रमोद सावंत हांचेर मात नियती बरीच उदार जाल्ली दिसता. प्रतिकूल अशे परिस्थितींत वादळांत सांपडिल्ले बोटीच्या कॅप्टनाचें पद स्विकारले उपरांत खूबशा वादळांक तोंड दीत ती बोट वेवस्थीत देगेक लावप हें काम तशें निश्चीतपणान सोंपें नाशिल्लें. डॉ. प्रमोद सावंत हांणी तें काम तर केलेंच, पूण आयज स वर्सां ह्या बोटीच्या कॅप्टनपदार सेगीत रावन लेगीत तांणी अशी आपली सुवात घट केल्या की अजून कांय वर्सां वा राज्य विधानसभेच्या येता ते वेंचणुके मेरेन निदान तांकां थंय सावन हालोवपाचें जालें तरी भाजपाच्या केंद्रीय फुडारपणाक ताचेर बरोच विचार करचो पडटलो. म्हाका केंद्रांत वचपाची इत्सा ना अशें मुख्यमंत्री डॉ. सावंत हांणी हालींच खंय तरी उलयतना म्हणिल्ल्याची याद जाता. आतां तांणी केंद्रांत वच्चें काय ना हें तांचे इत्सेचेर थोडेंच निंबून आसतलें, कारण अशा वेळार ‘आले नेतृत्वाच्या मना तेथे कुणाचेही चालेना’ होच नेम लागू जाता. तांचे राजकी गुरू मनोहर पर्रीकार हांणी लेगीत केंद्रांत वचूंक नाका म्हूण कितलो यत्न केलो हाचे आमी साक्षिदार आसात. तांकां निमाणें तांचे इत्से आडूच दिल्लीक वच्चें पडलें हो इतिहास तसो ताजोच आसा.
मुख्यमंत्री डॉ. प्रमोद सावंत हांकां दिल्लीचें आपोवणें आयलां अशी परिस्थिती गोंयांत निर्माण जाल्या अशें हांव म्हणचो ना. हाचें कारण म्हणल्यार तांणी फाटल्या स वर्सांत गोंयाक बरें फुडारपण दितना भाजपाच्या केंद्रीय फुडारपणाचो जो विस्वास जिखला तो खूब म्हत्वाचो आसा. सुमार स वर्सां सेगीत मुख्यमंत्रीपदार राविल्ल्यान एक नवी उर्जाच तांचे मदीं आयिल्ल्याची आयचीं कामां पळयत जाल्यार डॉ. प्रमोद सावंत हांचे मदीं दिसूंक लागल्या. तातूंतच सामकी उत्साही आनी कार्यकर्त्यां मदल्यानूच प्रदेश अध्यक्षपदा मेरेन पाविल्ले सळसळट्या रगताचे दामू नायक हांचो सांगात तांकां मेळ्ळा. डॉ. प्रमोद सावंत आनी दामू नायक हे दोगूय गोंयच्या राजकारणांत फुडलीं कांय वर्सां भारतीय जनता पक्षाक एका वेगळ्याच उंचायेर व्हरून दवरपाचें काम करतले अशें सद्या तांचो कामाचो नेट पळयत जाल्यार म्हणूं येता. राज्य विधानसभा वेंचणूक तशी पळयत जाल्यार अजून दोन वर्सां पयस आसा. घडये चार वर्सांय मुखार वचूंक शकता, पूण ह्या दोगांचीय चालू आशिल्ली कामाची गती पळयत जाल्यार वेंचणूक बी लागीं पावूंक ना मूं असो प्रस्न खूबशा जाणांक पडचो. पूण तशें काय ना. ही वस्तुस्थिती आसा. दामू नायक प्रदेश भाजपाचे अध्यक्ष जायत सावन खूबशे कडेन कार्यकर्त्यांच्या मेळाव्याचें जें आयोजन चल्लां तातूंतल्यान एकूच गजाल ठळकपणान दिसून येता आनी ती म्हणल्यार येता ते विधानसभा वेंचणुकेंत विरोधकांक कसलीच संद दिवप ना.
काल पयरूच फोंडें म्हालांतल्या प्रियोळ मतदारसंघांत जाल्ल्या भाजप कार्यकर्त्यांच्या मेळाव्यांत मुख्यमंत्री डॉ. प्रमोद सावंत हांणी सडेतोडपणान जें विधान केलें ताका दाद दिवचीच पडटली. पक्ष फुडारपणाचो वरदहस्त माथ्यार आसले बगर कोणूय फुडारी मागीर तो मुख्यमंत्रीपदार आसूं, अशें विधान करचो ना हें मान्य करचेंच पडटलें. प्रियोळा सारक्या मतदारसंघांत महाराष्ट्रवादी गोमंतक पक्षाक खडसावप ही तशी सादी गजाल न्हय, पूण मुख्यमंत्री डॉ. प्रमोद सावंत आनी प्रदेश अध्यक्ष दामू नायक हांणी ह्या मेळाव्यांतल्यान जो संदेश दिला ताची दखल मगोचे बराबरीन विरोधी पक्षांकूय घेवची पडटली. अशें मुख्यमंत्र्यांनी कितें म्हणलें हें समजून घेवपाचें आसत जाल्यार भाजपाच्या मार्गांत आड न येवपाची ताकीद सरकारांत सांगाती आशिल्ल्या मगो फुडारपणाक तांणी दिलीच, पूण तेच बरोबर प्रियोळ आनी मांद्रें मतदारसंघांत उमेदवार उबो करपाचो विचार करूं नाकात, हे दोनूय भाजपाचे मतदारसंघ आशिल्ल्याचें खडसावन सांगलें. भाजपा कडेन युती जाय काय नाका हें आतांच मगो पक्षान सांगचें अशी शिटकावणी दितना मुख्यमंत्री डॉ. सावंत हांणी नेमको खंयचो संदेश ढवळीकार भावांक दिलो हाचेरूय आतां चर्चा सुरू जावप सभाविकूच आसा. गोंयांत भाजपाची शक्त इतली वाडल्या की तांकां हाचे मुखार तेंक्याची गरज ना असो संदेश तांणी मगो फुडाऱ्यांक दिला की आतांच कितें तें स्पश्टपणान सांगून मंत्रीमंडळ फेररचणुके खातीर आपली वाट मेकळी करात अशें तर मुख्यमंत्र्यांक सांगपाचें ना मूं? अशेंय खूबशा जाणांक दिसूंक शकता.
दिल्ली जिखले उपरांत बिहारूय जिखपाक मुखार सरिल्ल्या भारतीय जनता पक्षाच्या फुडाऱ्यांचें गोंया कडेनूय तितलेंच लक्ष आसा हें हातूंतल्यान स्पश्ट जाता. गोंयांत विरोधी पक्षाची हालत भाजपान तेच बरोबर मुख्यमंत्री डॉ. प्रमोद सावंत हांणी सामकी नाजूक करून दवरल्या. काँग्रेस, आम आदमी, गोवा फॉरवर्ड, आरजी हे पक्ष येता ते वेंचणुकेंत एकामेकांचेंच पांय कशे ओडटले आनी आपल्या जैताचो मार्ग कसो नितळ जातलो हाचे कडेन लक्ष दितूच भाजप गणितां मांडीत आसा, आनी ताचेरूच डॉ. सावंत आनी दामू नायक हे दोगूय कामाक लागल्यात हें सद्या स्पश्ट दिसून येता. तातूंत भर म्हूण हें एक नवें पिलूय तांणी प्रियोळांत सोडून दिलां आनी तातूंतल्यान नेमकी कसली प्रतिक्रिया येता हाचो अदमास तांकां घेवपाचो आसा आनी उपरांतूच निर्णयाचेर म्होर मारप हो एकूण धोरणाचो भाग दिसता. महाराष्ट्रवादी गोमंतक पक्षा खातीर हें सगलें अनपेक्षीत आशिल्ल्यान तांच्या पंगडांत खवदळ पडप सभाविकूच आसा. मगो पक्षाक कोंयडेंत गांठिल्ल्यानूच कांय राजकी लाव अपेक्षीत आसात. मगोन सरकारांतल्यान भायर सरपाचो निर्णय घेत जाल्यार भाजपाचें काम आनीक सोंपें जातलें आनी घेतलो ना तरी लेगीत फुडारा खातीर तें फायद्याचेंच थारतलें. एका फातरांत दोन सुकणीं मारपाचो भाजपाचो हो यत्न आसून विरोधकांक शिरजोर जावंक न दिवप होच हाचे फाटलो उद्देश आसा. मंत्रीमंडळ फेररचणूक तर सामकी तोंडार आशिल्ल्यान गोविंद गावडेंक हतयाचें बळ दिवन आश्वस्त करपाचोय हो प्रकार आसूंक शकता अशेंय कांय राजकी जाणकारांक दिसता. भाजपांत दाखल जाल्ल्या बाटग्यांक मंत्रीमंडळांत स्थान दिवचें न्हय अशी मागणी नेट धरीत आसली तरी मुख्यमंत्री नेमके खंयच्या निकशाचेर नव्या मंत्र्यांची निवड करतात हाचे कडेन सगल्यांचें लक्ष लागून आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
