भांगरभूंय | प्रतिनिधी
पणजीः गोंयांत काजवाची लागवड आनी ताचे देखरेखी खातीर राज्य फलोत्पादन अभियाना खाला राज्यांतल्या काजिकारांक फाटल्या तीन वर्सांत 99 लाख इतलो निधी फावो जाला. जाल्यार दक्षीण गोंयांत काजवांचे देखरेखी खातीर काजू आनी कोको उदरगत संचालनालय कोची हांचे कडल्यान वर्स 2024-25 खातीर रु. 14.34 लाख इतलो निधी मेळ्ळा अशी म्हायती शेतकी आनी शेतकार कल्याण मंत्रालयान दिल्या.
दक्षीण गोंयचे खासदार कॅप्टन विरियातो फर्नांडीस हांणी लोकसभेंत विचारिल्ल्या प्रस्नांक शेतकी आनी शेतकार कल्याण राज्यमंत्री रामनाथ ठाकूर हांणी लेखी जाप दिल्या.
फलोत्पादना खातीरच्या एकवटीत उदरगत अभियान ही केंद्रीय येवजण चालीक लावन राज्यांत काजू सारकिल्ल्या फळांची फलोत्पादन मळार समग्र वाड करतात.
हे येवजणेच्या सगल्या उपक्रमाची अंमलबजावणी काजू आनी कोको उदरगत संचालनाय कोची हांचे वरवीं जाता. 90 हॅक्टर जमनींत बरी पिकावळ दिवपी प्रजातीच्या काजूची लागवड करून आनी फाटल्या वर्सा 88 हॅक्टरांत लायल्ल्या काजवांची देखरेख करपा खातीर दक्षीण गोंयच्या सांगें, केपें आनी काणकोण म्हालांतल्या काजीकारांक 14.34 लाख मंजूर केल्यात.
जाल्यार राज्यांत काजवाच्या उत्पादनांक अर्थीक सहाय्य दिवपा खातीर राज्य फलोत्पादन अभियाना खाला 99.29 लाख इतलें अनुदान काजिकारांक फावो जालां. तातूंतल्या वर्स 2021-22 सांत 27.59 लाख, 2022-23 सांत 35.75 लाख आनी 2023-24 सांत 35.95 लाख शेतकारांक फावो जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
