भांगरभूंय | प्रतिनिधी
पणजी : फाटल्या सप्तकांत गोंयांत पडिल्ल्या आडवेळ्या पावसाक लागून मानकुराद आंबो सवाय जाला. पणजी बाजारांत मानकुराद आनी हापूस आंब्याचे दर देंवल्यात. फाटल्या सप्तकांत 5500 रुपया डझन आशिल्लो मानकुराद देड ते दोन हजार रुपया डझन जाला. मात हे आंबे ल्हान ते मध्यम आकाराचे आसात. ल्हान आकाराचे हापूस आंबे 800 रुपया जाल्यार मध्यम आकाराचे आंबे 1300 रुपया डझन दरान विकताले.
सोमारा पणजी बाजारांत लालबाग आंबो 150 रुपया कील, तोतापुरी आंबे 180 रुपया, सिंदुरी आंबे 200 रुपया जाल्यार पायरी आंबे 300 रुपया कील ह्या दरान विकताले.
मध्यम आकाराचीं तोरां 100 रुपयांक 10 मेळटालीं. मध्यम आकाराचो नाल्ल 40 रुपया, व्हड नाल्ल 50 रुपयांक एक मेळटालो. मागणी चड, पूण आवक उणी आशिल्ल्यान लिंबाचे दर वाडून 10 रुपया एक नग जाला.
बाजारांत टमाटां वाडून 40 रुपया आनी बटाट 50 रुपया कील आशिल्ले. कांदो 40 रुपया कील, मिरसांग 120 रुपया कील जाल्यार ढब्बू मिरसांग 80 रुपया कील आशिल्ली. तवशीं 50 रुपया, गाजर 60 रुपया कील आशिल्ले. मटराचो दर 100 रुपया कील आशिल्लो. कोबीचो एक गड्डो 40 रुपया जाल्यार फ्लॉवर 30 रुपयांक एक गड्डो मेळटालो. भेंडे 60 रुपया, वालपापडी 120 रुपया कील आशिल्ली. बाजारांत म्हस्काच्यो सांगो सवाय जावन 120 रुपया कील मेळटाल्यो. मेथी 20 रुपया, शेपू 15 रुपया, पालक 10 रुपया, कांद्याची पात 10 रुपया जाल्यार तांबडी भाजी 10 रुपयांक जुडी मेळटाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
