भांगरभूंय | प्रतिनिधी
पणजी : गोंयांत पयली ते चवथी यत्ते मेरेन मुळाव्या शाळांनी शिकपी विद्यार्थ्यांचे गळटीचें प्रमाण वाडत आसा. अर्थीक सर्वेक्षण अहवालांतल्यान ही गजाल स्पश्ट जाता. फाटल्या तीन शिक्षणीक वर्सांचो विचार केलो जाल्यार मुळाव्या शाळांतलें गळटीचें प्रमाण 0 वयल्यान 0.81 मेरेन वाडलां.
2021 – 22 शिक्षणीक वर्सा गळटीचें प्रमाण 0 टक्के आशिल्लें. तें 2023 – 24 त 0.81चेर पावलें.
पांचवी ते आठवी (अपर प्रायमरी) आनी माध्यमीक (सेकंडरी) पावंड्याचेर मात गळटीचें प्रमाण देंवतां, अशें अर्थीक सर्वेक्षण अहवालांत म्हणलां.
2019 – 20 वर्सा पयली ते चवथी (मुळावो पांवडो) यत्ते मेरेन गळटीचें प्रमाण 0.27 आशिल्लें. 2020 – 21 त हें प्रमाण 0.68 जालें. हाचे उपरांत 2021 – 22 त हें प्रमाण 0 जालें. फाटलीं दोन वर्सां परतून प्रमाण वाडपाक लागलें. 2022 – 23 त गळटीचें प्रमाण 0.31 जाल्यार 2023 – 24 प्रमाण 0.81 टक्के जालें. हातूंत परतून चल्यां परस चलयांचे गळटीचें प्रमाण चड आसा. 2023 – 24 त चल्यांचें गळटीचें प्रमाण 0.75 जाल्यार चलयांचे गळटीचें प्रमाण 0.88 आशिल्लें. हाचे आदीं 2022 – 23 त चल्यांचे गळटीचें प्रमाण 0 जाल्यार चलयांचे गळटीचें प्रमाण 0.66 आशिल्लें.
पांचवी ते आठवी (अपर प्रायमरी) मेरेनचो विचार केलो जाल्यार 2023 – 24 त गळटीचें प्रमाण 1.09 आसा. हातूंत चल्यांचे गळटीचें प्रमाण 1.16 जाल्यार चलयांचे गळटीचें प्रमाण 1.02 टक्के आसा. णवी ते धावी मेरेन 2023 – 24 त विद्यार्थ्यांचे गळटीचें प्रमाण 8.07 टक्के आसा. हातूंत चल्यांचे गळटीचें प्रमाण 10.18 जाल्यार चलयांचे गळटीचें प्रमाण 5.8 आसा. णवी ते धावी मेरेन चलयां परस चल्यांचे गळटीचें प्रमाण चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
