भांगरभूंय | प्रतिनिधी
डॉ. सावंत, दामू सयत एक मंत्रीय पावलो दिल्ली
भांगरभूंय । प्रतिनिधी
पणजी : गोंय मंत्रीमंडळांत फेरबदल जातलो अशी चर्चा तेंगशेर पाविल्ली आसतनाच मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक हांचे सयत एक मंत्रीय दिल्ली पावला. मंत्रीमंडळ फेरबदलाचे नदरेन ह्या सगळ्यांच्यो केंद्रीय फुडाऱ्यां कडेन परतून एकदां बसका जाल्यात. ताका लागून खंयच्याय खिणाक मंत्रीमंडळांत बदल जातलो, अशी चर्चा राजकी मळार चल्ल्या.
विधानसभेच्या अर्थसंकल्पीय अधिवेशनाच्या निमाण्या दिसा प्रदेशाध्यक्ष दामू नायक हांणी दिल्ली भोंवडी करून मंत्रीमंडळ फेरबदलाचे नदरेन वरिश्ठ फुडार्यां कडेन गुपीत बसका घेतिल्ल्यो. ते परांत रोखडेच मुख्यमंत्री डॉ, सावंत आनी दामू नायक दिल्ली गेल्ले. ह्या दोगांकूय परतून मंगळारा दिल्ली आपयल्ले, पण ते आदींच हे दोनूय फुडारी आनी तांचे वांगडा एक मंत्री लेगीत दिल्ली पावला. हाका लागून गोंयकारांचें लक्ष दिल्लीचेर आसा.
तीन दिसां आदीं प्रुडंट मिडिया चॅनला वयले ‘हेडऑन’ कार्यावळींत उलयतना मुख्यमंत्री डॉ. सावंत हांणी सांगिल्लें, फुडली विधानसभा वेंचणक जिखपा खातीर मंत्रीमंडळांत फेरबदल करतले. एका, दोगांक मंत्र्यांक काडटले, अशें स्पश्ट केल्लें. ते उपरांत रोखडेच ते दिल्ली गेल्ल्यान मंत्रीमंडळांत फेरबदल खंयच्याय खिणाक जावं येता हाचेर म्होर बसल्या.
तीन-चार निश्क्रीय मंत्र्यां विशींय चर्चा
मुख्यमंत्री डॉ. प्रमोद सावंत हांणी म्हणलां, एका – दोगां मंत्र्यांक काडटले, पूण तीन ते चार निश्क्रीय मंत्र्यांक काडपा संबंदांतूय दिल्लींत चर्चा चल्ल्या. तांचीं नांवांय निश्चीत केल्यांत. फुडल्या दोन वर्सांत जिल्हो पंचायत, पालिका तशेंच विधानसभा वेंचणूक आसा. ह्या सगळ्या वेंचणुकांनी स्पश्ट भोवमत मेळोवपाची मोख भाजपान दवरल्या. तेच नदरेन मंत्रीमंडळांत फेरबदल जावपाचो आशिल्ल्यान जांकां मंत्री म्हूण संद दिवपाची आसा, तांचो ह्या वेंचणुकांनी कितलो फायदो जातलो, हाचेर दिल्लींतल्या बसकांनी चर्चा चल्ल्या.
सध्याच्या मंत्रीमंडळांत एकेय बायलेचो आस्पाव ना. ताका लागून एके बायलेक मंत्रीमंडलांत सुवात दिवपा संबंदांत विचार चल्ला, अशी म्हायती भाजपांतल्या एका ज्येश्ठ फुडार्यान दिली. ज्या मंत्र्यांक मंत्रीमंडळांतल्यान काडटले, तांच्या कार्यकर्त्यांची नाराजी पक्षाक मारक थारूं येता काय कितें आनी तशें जालें जाल्यार तांची नाराजी कशी पयस करची, हे विशींय केंद्रीय नेतृत्वान फाटल्या कांय बसकांनी मुख्यमंत्री डॉ. सावंत आनी प्रदेशाध्यक्ष दामूना यक हांचे कडेन चर्चा केल्या.
सुदिन ढवळीकार हांकां काडटले !
भाजप – मगो युती आशिल्ल्यान सध्याच्या मंत्रीमंडळांत भाजर फुडारी सुदिन ढवळीकार हांचो आस्पाव केला. भाजपा कडेन सध्या स्पश्ट भोवमत आशिल्ल्यान तशेंच तिनूय अपक्ष आमदारांचोय तेंको आशिल्ल्यान मगोच्या मंत्रीपदाक भाजपाच्याच कांय आमदारां कडल्यान भितरल्यान विरोध जाता. तातूंत लोकसभा वेंचणुकेंत लेगीत दक्षीण गोंयांत मगोचो भाजप उमेदवाराक जाय तितलो फायदो जावंक ना. हाची म्हायती मुख्यमंत्री डॉ. प्रमोद सावंत आनी प्रदेशाध्यक्ष दामू नायक हांणी केंद्रीय नेतृत्वाक दिल्या. ताका लागून सुदिन ढवळीकार हांकां मंत्रीमंडळांतल्यान काडपाची शक्यताय आसा, अशें भाजपांतल्या सुत्रांनी ‘भांगरभूंय’ कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
