भांगरभूंय | प्रतिनिधी
गोंयचें नवें उद्देग धोरण जाहीर जाता थंय आसा, काल कंत्राटी कामगारांचो प्रस्न विधानसभेंत आयलो. वीज खात्यांत फाटलीं 12 वर्सां 400 वयर कामगार कंत्राटाचेर काम करतात. 341 लायनमन आनी 119 मिटर रिडर. तांकां केन्ना कायम करतले, असो प्रस्न आमदार आलेक्स सिकेरा हांणी विचारिल्लो. ताचेर लेखी परिक्षा दिले बगर नोकरेंत कायम करचे नात, अशें सरकारान स्पश्ट केलें. तांकां नेमणूक पत्रां 10 वर्सां पयलींच मेळ्ळ्यांत, मात सरकारी नेमा प्रमाण तांकां लेखी परिक्षा दिवचीच पडटा. चवथी यत्ते मेरेन शिकिल्ले कामगार ती दिवपाक शकतले काय ना, हें कळना. तातूंत लक्ष घालपाचें उतर मुख्यमंत्री डाॅ. प्रमोद सावंत हांणी दिला. काॅण्ट्रॅक्ट पद्दत 1990 च्या दशकांत सुरू जाल्ली, तेन्ना बोवाळ जाल्लो. मात कामगार संघटनांच्या आंदोलनांक कोणे भीक घाली ना. उरफाटे दीस वतात, तशी ही पद्दत चरतें पातळचें तशी सगल्याच मळांचेर पातळ्ळी. कोण कायम, कोण काॅण्ट्रॅक्टाचेर हें जेन्ना आंदोलनां जातात, तेन्नाच लोकांक कळटा. हालींच्या वर्सांनी शिक्षक, प्राध्यापक, क्लार्क, अधिकारीय काॅण्ट्रॅक्टाचेर काम करतात. दर वर्सा तांची कबलात एक वर्सान वाडयतात. पगार उणो मेळटा, सवलतीय मेळनात. कांय सरकारी खातीं सोडलीं जाल्यार नोकरेंत कायम जावपी वा वेतन मंडळांच्या नेमा प्रमाण पगार, सवलती मेळपी कर्मचारी, कामगार, अधिकारी दुर्मीळ. देश – विदेशांतल्या व्हडल्या – व्हडल्या आयटी कंपन्यांनी वर्साचें पॅकेज मेळटा. ‘काम तशें दाम’ ही संकल्पना आतां सगलेच कडेन रुजल्या….. आनी हाका कांय प्रमाणात कामगार- कर्मचारी वर्गूय जापसालदार आसा. खास करून सरकारी सेवेंतलो. कारण एकदां ‘फिक्स’ जालो काय कार्यालयांतल्या सायबाक पसून शापोतां सांगपी कर्मचारी आसात. हो अहंकार, दादागिरीचो वसो सगल्यांनी घेतलो आनी ल्हवू ल्हवू करून हे कंत्राटी पद्दतीन पांय रोयले. ती बरी काय वायट, हाचेर वाद- संवाद जावं येता. वीज खात्याच्या कामगारांचो प्रस्न आमदार सिकेरान काडलो, हेर खात्यांतल्या कर्मचाऱ्यांचें कितें?
पयरूच नवें उद्देग धोरण आयलां. उद्देग वसणुकांतल्या उद्देगांनी कंत्राटी पद्दत चलता. थंयच्या कामगारांचें म्हणणे आयकून घेतल्यार, बऱ्योच गजाली भायर सरतल्यो. ताचेरूय विचार करचो. धोरणाक मंजुरी मेळटकच, उद्देगमंत्री माविन गुदिन्य हांणी फुडल्या पांच वर्सांनी गोंयच्या उद्देगांनी 20 हजार कोटी रुपयांची गुंतवणूक करपाची आनी 30 हजार नोकऱ्यो दिवपाची मोख दवरल्या अशें सांगलें. ताचे परस म्हत्वाची घोशणा तांणी केली, ती म्हणल्यार सरकारी येवजण्यो,सवलती घेवपी उद्देगांक 60 टक्के नोकऱ्यो गोंयकारां खातीर राखून दवरच्यो पडटल्यो. तें प्रत्यक्षांत येवप तशें कठीणूच. कारण कंपनी भायली आसल्यार ती म्हत्वाच्या जाग्यांचेर आपल्या मनशांक दवरता. संबंदीत कारखान्यान ही 60 टक्क्यांची तजवीज केली, जाल्यार फावो तितले गोंयकार उमेदवार मेळटले हाची खात्री कितें? गोंयकारांक मानवतात, तसलेच कारखाने हाचे मुखार राज्यांत आयले जाल्यार एकवेळ हें जावं येता. कांय उद्देगांक लागतात, तीं कुशळटायेचीं कामां गोंयकारांनी शिकून घेवपाक जाय. ते संबंदीचे अभ्यासक्रम गोंयच्या शिक्षण संस्थांनी सुरू जावपाक जाय. आयज आयटी शिकिल्ले गोंयकार एखादो आडवाद सोडल्यार बंगळुरू आनी पुण्यां वतात. नाजाल्यार विदेशांत. गोंयांत येवपी प्रत्येक उद्देगाक लागता तें मनीसबळ गोंयांत तयार जावचें, हे खातीर पयले यत्न करचे पडटले. प्रत्येकाक 60 टक्के गोंयकार कामगार, कर्मचारी मेळ्ळे, अशें धरून चलुया. तांकां कायम स्वरुपी काम मेळटलें काय काॅण्ट्रॅक्टाचेर?
गोंयांतलें हें पयलें सरकारी धोरण न्हय, हाचे पयलींच खूब आयल्यांत. मात तीं चालीक लागल्यांत काय, हाचो नियाळ सरकारी यंत्रणेक घेवचो पडटलो. वेर्णा आनी हेर 1-2 कडलो आडवाद सोडल्यार भोवतेक उद्देगीक वसणुकांनी बऱ्याच कारखान्यांची भलायकी इबाडल्या. हाचे वयल्यान कितें निश्कर्श काडपाचो? कांय कारखानदार फक्त सरकारी सवलतीं खातीर गोंयांत येतात आनी कांय तेंपान कारखाने विकून वा बंद करून परत वतात. हाचो धपको तरणाट्यांक बसता. कारखानो सुरू करपाक परवानगी प्रक्रिया, सोपस्कार सुरळीत करपाचेंय थारलां. वीज, उदक, येरादारीचे बाबतींय तांकां सोंपेंपण मेळपाक जाय. हें करतनाच, कांय आस्थापनां, खातीं, मंडळां, कारखान्यांनी उठसूठ संप कित्याक जातात, तीं कारणां सोदून ताचेर उपाय घेवचे पडटले. गोंयकारांक 60 टक्के जागे दिवपाची सक्ती केल्या खरी, पूण ती चालीक लागतली तेन्नाच खरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
