पोरण्यां गोंयां आयज केतेवान संगीत महोत्सव

भांगरभूंय | प्रतिनिधी

भांगरभूंय । खबरां मेज
पणजी : जाॅर्जिया दुतावास (नवी दिल्ली) आनी प्रुडंट मिडिया वतीन आयज २१ वेर सांजवेळा ७ वरांचेर केतेवान संगीत महोत्सव आयोजीत केला. पोरणें गोंयचे सेंट आगुस्तीन चर्चीच्या अवशेश वाठारांत तो जातलो. सगल्यां खातीर तो उक्तो आसा.
ह्या महोत्सवांत ‘गुर्जानी’ हो जाॅर्जियाचो लोककला पंगड वेंचिक लोकगीतां सादर करतलो. हो पंगड 1967 वर्सां स्थापन केल्लो. हातूंत जाॅर्जिया देशाची लोककला पळोवपाची संद रसिकांक मेळटली.

सोनिया सिरसाट संवसारीक संगीत सादर करतली. तातूंत जाॅर्जिया, अलेंटेजो, काबो वर्दे, मिन्हो आनी गोंयची पदां आसतलीं. गायिका पदांचो इतिहास, म्हायतीय दितलें.

मंदाकिनी त्रिवेदी आनी अनेरी सेठ मोहिनीअट्टम (केरळाचो लोकनाच) सादर करतलीं. संवसारीक महिला शक्तीचेर तीं उजवाड घालतलीं. सेंट क्वीन केतेवान हांकां ओंपिल्लीं हीं आर्गां आसतलीं.
हे कार्यावळीक जाॅर्जिया संस्कृती मंत्रालय, भारतीय संस्कृतीक संबंद परिशद (आयसीसीआर) हांणी पालव दिला. सरबराय भागीदार ताज – सिदाद दे गोवा आसात. तर शो-हावस हांणी ही कार्यावळ क्युरेट केल्या.

राणी केतेवानचे बलिदान

राणी केतेवान ही जाॅर्जियाच्या बाग्रातिओनी राजघराण्यांतली चली. तिचें लग्न काखेतीचो राजपुत्र दावीत हांचे कडेन जाल्लें. किंग अलेक्झांडर दोन (1574- 1605) हांचो तो पूत. 1602 त दावीत संवसाराक अंतरलो. केतेवानाक एक पूत आनी चली आशिल्ली. चार म्हयन्यां पयलीं साधू जाल्ल्या अलेक्झांडराक परत राजा जावचें पडलें. तेन्ना ताचो दुसरो पूत कान्स्टेंटायन -मिर्झा (जो पर्शियाचो राजा शहा अब्बासाच्या दरबारांत आशिल्लो.) आयलो आनी ताणें राजा अब्बासाच्च्या सांगण्यां वयल्यान बापूय आनी दुसऱ्या भावाक जिवेशीं मारले. तांची तकली राजाक धाडली.
उपरांतच्या काळांत राणी केतेवानाचो पूत तैमूराज 1 राजा जालो, पूण ताका आवय आनी आपल्या पुतांक अब्बासा कडेन ओलीस दवरचें पडलें. उपरांत अब्बासान जाॅर्जियाचेर हल्लो करून तैमूराज हाका हारोवन तो वाठार ताब्यांत घेतलो. चर्ची, राजवाडो नश्ट केलो. राणी केतेवानाक मुस्लीम धर्म स्विकारून आपले कडेन लग्न जावपाक सांगलें. ती तयार जावंक ना. तिका धा वर्सां बंदखणींत घाली. उपरांत 1624 त तिका सगल्यां लोकां मुखार अक्षरशा हाल हाल करून मारली.
ह्या वेळार सेंट आगुस्तीन पंथाचे कांय मिशनरी थंय आशिल्ले. तांणी ल्हवूच तिचे कुडीचे अवशेश जाॅर्जियांत व्हेले. थंय ते आलावेर्दी माॅनेस्ट्रीक दिले, तर थोडे 1627 त गोंयां हाडून सेंट आगुस्तीन चर्चीं लागसार दफन केले. त्या वेळार पुर्तुगेजांची गोंयांत सत्ता आशिल्ली. कागदपत्रां प्रमाण, त्या अवशेशांत तिचो उजवो हात आशिल्लो, अशें कळटा.
9 जुलय 2021 दिसा भारत सरकारान ह्या दोन अवशेशांतले एक अवशेश जाॅर्जिया सरकाराक परत दिलो. आपल्या देशा खातीर, धर्मा खातीर, कुटुंबा खातीर बलिदान दिवपी हे राणयेक उपरांतच्या काळांत संतपद मेळ्ळें.