भांगरभूंय | प्रतिनिधी
केपें बसस्टॅण्डा खातीर 25 कोटींची निविदा जारी
भांगरभूंय । प्रतिनिधी
पणजी : एखाद्या प्रकल्पाक मान्यताय मेळ्ळे उपरांत निविदा जारी जाता. निविदा जारी जावन बुन्यादी फातर बसोवन कामाक सुरवात जाता. केपें बसस्टॅण्डा विशीं मात उरफाटो प्रकार घडला. बसस्टॅण्डाक मान्यताय मेळून, निविदा जारी जाली. तेन्नाच्या मंत्र्यान बुन्यादी फातर लेगीत बसयलो. आतां ह्या बसस्टॅण्डाची गरज विचारांत घेवन निर्णय जातलो, अशें येरादारी मंत्री मॉवीन गुदिन्हो हांणी सांगलें. प्रकल्प धवो हती थारचो न्हय, म्हूण फेरनियाळ घेवपाची गरज येरादारी मंत्र्यान उक्तायली.
ह्या बसस्टॅण्डाची 25 कोटींची निविदा भौशीक बांदकाम खात्यान जारी केल्या, अशें मुख्यमंत्री डॉ. प्रमोद सावंत हांणी सांगलें.
केपेंचे आमदार एल्टन डिकॉस्ता हांणी विचारिल्ल्या प्रस्नाचेर सभाघरांत केपें बसस्टॅण्डाचेर चर्चा जाली. केपें बसस्टॅण्डा खातीर सरकारा कडेन कितली जमीन आसा, असो प्रस्न एल्टन डिकॅस्ता हांणी विचारलो. बसस्टॅण्डाक मान्यताय दिवन निविदा जारी जाल्ली. आदले मंत्री तशेंच आमदारान बुन्यादी फातर बसयलो. होंडा, शिरोडेंचो बसस्टॅण्ड वापराविणें पडून आसा. देखभालीचेर बरोच खर्च येता. आतां केपें बसस्टॅण्डाची खऱ्यांनीच गरज आसा काय ना, हाचो विचार करून बसस्टॅण्डा विशीं निर्णय घेतले. हेर बसस्टॅण्डां भशेन हो बसस्टॅण्ड धवो हती जावपाक जायना, म्हूण सरकार जतनाय घेतलें. आमदारा सयत बसस्टॅण्डाचे सुवातेची आपूण पळोवणी करून उपरांत निर्णय घेतलों, अशें येरादारी मंत्री मॉवीन गुदिन्हो हांणी स्पश्ट केलें. हेर बसस्टॅण्डांची स्थिती बाबत आसा. तांची दुरुस्ती जावपाक जाय. वाळपय बसस्टॅण्डचेर सभाघराचें बांदकाम जालां. ह्या सभाघराचो वर्सांतल्यान फक्त 20 ते 22 दीस वापर जाता. अस्नोडें बसस्टॅण्डा वयल्या सभाघराक लागून शिरगांवचो रस्तो अशीर जाला. ते खातीर केपें बसस्टॅण्डा विशीं विचार करून निर्णय घेवपाची गरज आसा, अशें मंत्री गुदिन्हो हांणी सांगलें.
सरदेसाय हांची सरकाराचेर टिका
निविदा जारी जावन बुन्यादी फातर बसयलो. आतां फेरविचार ही कसली पद्दत? असो प्रस्न विजय सरदेसाय हांणी केलो. सरकार ही सातत्यान चलपी प्रक्रिया आसा. आदल्या सरकारांनी कितें चुको केल्या आसत जाल्यार त्यो दुरुस्त करून फुडें वचपाक जाय, अशें मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
