भांगरभूंय | प्रतिनिधी
उदरगतीच्या कामां खातीर १५ ते २० कोटी रुपया येतलो खर्च
पणजी : अर्थीक वर्स २०२५-२६ खातीर पणजी महापालिकेन १२० कोटींचो अर्थसंकल्प सादर केला. अदूं पणजेच्या विवीध उदरगतीच्या कामां खातीर १५ ते २० कोटी रुपया खर्च करतले, अशी म्हायती महापौर रोहित मोन्सेरात हांणी दिली. बिरेस्तारा महापालिकेचे अर्थसंकल्पीय बसके उपरांत तांणी माध्यमां वांगडा संवाद सादलो.
हाचे पयलीं नगरसेवक सुरेंद्र फुर्तादो हांणी अंदूंचो अर्थसंकल्प म्हळ्यार फकत कॉपी कट पेस्ट आशिल्ल्याचो आरोप केलो. महापौर मोन्सेरात हांणी, बचत, महसुला विशीं महानगरपलिकेची अर्थीक स्थिती बरी आसा. फाटल्या वर्साचे तुळेंत अंदूंचो अर्थसंकल्प ३० कोटी रुपया चड आसा. अंदूं महापालिकेक सुमार १२० कोटींचो महसूल, जाल्यार ११८ कोटी रुपया खर्च अपेक्षीत आसा. आमी करंझाळेचो नुस्तें बाजार आनी बालोद्यान, सांतिनेज दफनभूंय आनी हेर सुवातांचेर उदरगतीचीं कामां करपाचो निर्णय घेतला. तशेंच हेर सुवातांचेर गरजेचें बारीक सारीक काम करतले.
तशेंच महापालिका नॅशनल थिएटर, तशेंच पणजी बाजारांतलें लिव्ह अँड लायसन्स एग्रीमेंट अशा आडखळील्ल्या प्रस्नाचेरूय काम करता. पणजी महानगरपालिकेचे नवे इमारतीचें बांदकाम करचे पयलीं आदले इमारतींतल्यान कार्यालयां दुसरे कडेन हालोवपाची गरज आसा. हाका लागून बेगीनूच तात्पुरती सुवात सोदपाची गरज आसा. देखून आमी लोकांची बरे तरेन वेवस्था जातली अशी सुवात आमी सोदतात. मात सध्या चडश्या सरकारी इमारतींत सुवात ना. हाका लागून हें काम मात्शें आडकून पडलां, अशें तांणी मुखार सांगलें.
त्यान पयलीं महापालिका आयुक्त क्लेन मदेरा हांणी, अंदूं महापालिकेक पणजी बाजारांतलो लिव्ह अँड लायसन्स कराराचो प्रस्न घुस्पावपा सारको आसा. अशें जरी आसलें तरी आमी तातुंतल्यान मार्ग काडटात. गाडे आशिल्ल्यांक तांचीं मूळ कागदपत्रां सादर करपाक सांगलां. हो प्रस्न बेगीनूच सोडयतले. लिव्ह अँड लायसन्सा वरवीं अंदूं महापालिकेक ३० कोटी रुपयांचो महसूल अपेक्षीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
