भांगरभूंय | प्रतिनिधी
नवी दिल्ली, खबरां संस्था ः जेएनपीए बंदराक चौक शारा सावन तीन राष्ट्रीय म्हामार्गांक जोडपी स लेन रस्तो बांदपाक केंद्रीय मंत्रीमंडळान बुधवारा मान्यताय दिल्या. हो मार्ग 29.21 किमी लांब आसून ताका 4500 कोटी रुपया खर्च येतलो.
बांदकाम, वापर, हस्तांतरण ह्या तत्वाचेर हो मार्ग विकसीत करतले. प्रधानमंत्री नरेंद्र मोदी हांच्या अध्यक्षते खाला अर्थीक वेव्हार मंत्रीमंडळ समितीचे बसकेंत हो निर्णय घेतलो. जेएनपीए बंदराचेर म्हाल येरादारी खातीर कंटेनरांचो आंकडो वाडत आशिल्ल्यान तशेंच जूनांत सुरू जावपी नवी मुंबय आंतरराष्ट्रीय विमानतळाक लागून ह्या वाठारांत राष्ट्रीय म्हामार्ग वाडोवपाची गरज आशिल्ली.
सध्या जड वाहनांक पळस्पे फाटा, डी पॉयंट, कळंबोली जंक्शन, तशेंच पनवेल आनी मुंबय-पुणे एक्सप्रेस मार्गांतल्यान वचपाक दोन ते तीन वरां लागतात. जून सावन नवी मुंबय विमानतळा वयल्यान विमान सेवा सुरू जातली अशें जाहीर केलां. त्या वेळार थेट संपर्क मार्गाची गरज आसतली. त्या नदरेन हो मार्ग म्हत्वाचो आसा.
हो प्रकल्प जेएनपीए बंदरा (पगोटे गांव) सावन सुरू जातलो. मुंबय-पुणे म्हामार्गाचेर (एनएच-48) हांतूत मुंबय-पुणे हायवे आनी मुंबय-गोंय नॅशनल हायवे कडेन तो जोडटले.
दुदाच्या उत्पादनाक ६ हजार कोटी…
देशांत दुदाचें उत्पादन वाडोवपा खातीर केंद्र सरकारान दोन येवजण्यांनी सुदारणा केल्या. हाचे खाला राष्ट्रीय दुदाची उदरगत कार्यावळ आनी राष्ट्रीय गोकुळ मिशन ह्या दोन येवजण्यां खातीर 6,190 कोटी रुपयांची तरतूद जातली. दुदाचें उत्पादन, खरेदी, प्रक्रिया क्षमताय, प्रयोगशाळेंत चांचणी सुविधा आनी हेर मुळाव्या साधनसुविधां खातीर हो निधी खर्च जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
