भांगरभूंय | प्रतिनिधी
खासदार तानावडेंच्या लेखी प्रस्नाक दिल्ले जापेंतल्या आंकड्यांतल्यान स्पश्ट
पणजी: केंद्र सरकाराच्या प्रधानमंत्री जनधन, जीवन ज्योती बिमा, सुरक्षा बिमा, अटल पेन्शन, मुद्रा, स्टॅण्डअप इंडियन, विश्वकर्मा आनी स्वानिधी ह्या म्हत्वपूर्ण येवजण्यांक गोंयच्या लोकां कडल्यान बरो प्रतिसाद मेळटा. खासदार सदानंद शेट तानावडे हांणी हे विशीं राज्यसभेंत विचारिल्ल्या लेखी प्रस्नाचे जापेंत केंद्रीय वित्त राज्यमंत्री पंकज चौधरी हांणी येजण्यांच्या लाभार्थ्यां विशीं सादर केल्ल्या आंकड्यांतल्यान हें स्पश्टपणान दिसून येता.
प्रधानमंत्री जनधन येवजणे खाला 2019 वर्सा गोंयांत 1,58,686 खातीं आशिल्लीं. 26 फेब्रुवारी 2025 मेरेन तीं 2,12,509 जालीं. जीवन ज्योती बिमा येवजणेंत 2019 मेरेन 1,25,500 गोंयकार वांटेकार आशिल्ले. 2025 वर्सा हो आंकडो 3,48,763 जालो. प्रधानमंत्री सुरक्षा बिमा येवजणेंत 2019 मेरेन 2,67,898 जाण आशिल्ले. 2025 वर्सा हो आंकडो सुमार 7,34,770 जालो. 2019 वर्सा गोंयांत अटल पेन्शन योजणेचे 32,185 लाभार्थी आशिल्ले. 2025 वर्सा हो आंकडा 1,04,416 इतलो जाल्ल्याचें आंकड्यांतल्यान दिसून येता.
2019 मेरेन प्रधानमंत्री मुद्रा येवजण्यांचो 1,60,938 जाणांनी लाव घेतिल्लो. येवजणे खाला तांकां सुमार 1,710 कोटींचीं रिणां मेळिल्लीं. 2025 वर्सा हे येवजणेच्या लाभार्थ्यांची संख्या 3,81,054 जावन तांकां 5,178 कोटींचीं रिणां मेळिल्ल्याचें जापेंत म्हणलां. तशेंच स्टॅण्डअप इंडियन येवजणे खाला 2019 मेरेन गोंयांत 314 खातीं आशिल्लीं. तांकां केंद्रा कडल्यान 41.22 कोटींचो निधी मेळिल्लो. 2025 वर्सा खात्यांची संख्या 917 जावन तांकां 119.67 कोटींचो निधी मेळिल्ल्याचें आंकडतल्यान स्पश्ट जाता.
येवजण्यांचो असो घेतले लाव
येवजण 2019 26 फेब्रुवारी 25 मेरेन
प्रधानमंत्री जनधन 1,58,686 2,15,509 (खातीं)
जीवन ज्योती बिमा 1,25,500 3,48,763
सुरक्षा बिमा 2,67,898 7,34,770
अटल पेन्शन 32,185 1,04,416
मुद्रा 1,60,938 3,81,054
स्टॅण्डअप इंडियन 314 917
विश्वकर्मा, स्वनिधीच्या लाभार्थ्यांच्या आंकड्यांत वाड
प्रधानमंत्री विश्वकर्मा येवजणे खाला राज्यांतल्यान आतां मेरेन 4,964 अर्ज आयल्यात आनी तातूंतल्या 553 अर्जांक मंजुरी मेळ्ळ्या. तशेंच तांकां 345 कोटींचीं रिणां वितरीत केल्यांत. तशेंच प्रधानमंत्री स्वनिधी येवजणे खाला 2,785 अर्जांक मंजुरी मेळ्ळ्या, तांकां पांच कोटींचो निधी वितरीत केल्ल्याचेंय जापेंतल्या आंकड्यांतल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
