भांगरभूंय | प्रतिनिधी
पणजी: लग्नाचें हांयस दाखोवन दिल्लींतले एके बायलेचेर 2023 वर्सा लैंगीक अत्याचार केल्लो. ह्या प्रकरणांत प्रथमदर्शनी पुराव्याची दखल घेवन न्यायालयान तिसवाडी म्हालांतल्या तरणाट्या आड आरोप निश्चीत करपाचो आदेश दिला. हे विशींचो आदेश पणजेंतल्या जलदगती न्यायालयाचे न्यायाधीश दुर्गा मडकयकार हांणी दिला.
ह्या प्रकरणांत दिल्लींतल्या दोन भुरग्यांचे पिडीत बायलेन पणजी पुलीस स्टेशनार 11 जानेवारी 2024 दिसा तिसवाडी म्हालांतल्या दुबाविता आड कागाळ दाखल केल्ली. तातूंत दुबावितान पिडीत बायलेक लग्नाचें हांयस दाखोवन तिचेर 1 जून 2023 ते 11 जानेवारी 2024 मजगतीं तिसवाडी म्हालांतल्या दुबाविताच्या घरा तशेंच बार्देस म्हालांतले एके सुवातेर लैंगीक अत्याचार केल्ल्याचें कागाळेंत म्हणिल्लें.
ते प्रमाण पणजी बायलां पुलीस स्टेशनाच्यो निरिक्षक रीमा नायक हांच्या मार्गदर्शना खाला उपनिरिक्षक रुपाली गोवेकार हांणी दुबाविता आड भदंसंच्या कलम 420 आनी 376 खाला गुन्यांव दाखल केलो. ह्याच वेळार दुबावितान उत्तर गोंय जिल्हो आनी सत्र न्यायालयांत अटकपूर्व जामीन दाखल केलो. तो भायरायले उपरांत दुबावितान मुंबय उच्च न्यायालयाच्या गोंय खंडपिठांत अटकपूर्व जामीन दाखल केलो. ह्या प्रकरणांत न्यायालयान दुबाविताक अटकपूर्व जामीन मंजूर केला.
उपरांत बायलां पुलिसांनी तपास पुराय करून म्हापशेंच्या पयलो वर्ग न्यायालयांत 316 पानांचें आरोपपत्र दाखल केलें. तातूंत 19 साक्षिदारांची साक्ष नोंद केल्या. हें प्रकरण जलदगती न्यायालयाच्या अधिकारा खाला येत आशिल्ल्यान थंय वर्ग केलां. ह्या प्रकरणांत न्यायालयान दुबाविता आड प्रथमदर्शनी पुराव्याची दखल घेवन आरोप निश्चीत करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
