भांगरभूंय | प्रतिनिधी
लोकसभेंतले लेखी जापेंतल्यान आयलें मुखार
पणजी: केंद्र सरकाराच्या महात्मा गांधी राष्ट्रीय ग्रामीण रोजगार गॅरंटी (मनरेगा) येवजणे खाला राज्यांत सक्रीय आशिल्ल्या 7,393 कामगारां पैकीं 11.23 टक्के कामगार आधारबेस पेमेंट सिस्टम खातीर (एपीबीएस) पात्र नात. केंद्रीय ग्रामविकास राज्यमंत्री कमलेश पास्वान हांणी लोकसभेंतल्या लेखी प्रस्नाक दिल्ले जापेंतल्यान ही म्हायती मुखार आयल्या.
गोंयांत ‘मनरेगा’ खाला काम करपी वट्ट कामगारांची संख्या 51,321 इतली आसा. तातूंतल्या सुमार 66.40 टक्के कामगार आधारबेस पेमेंट सिस्टमा खातीर पात्र नात. हे विशीं गोंय देशांत अव्वल स्थानार आसा. जाल्यार 51,321 पैकीं 7,393 कामगार सक्रीय आसून, तांचे मदीं 11.23 टक्के कामगार ह्या सिस्टमा खातीर पात्र नाशिल्ल्याचें मंत्री पास्वान हांणी जापेंतल्यान सादर केल्ले आंकडेवारी वेल्यान दिसून येता.
‘मनरेगा’ खाला काम करपी कामगारांक आधारबेस पेमेंट सिस्टमा वरवीं पगार दिवपाचें केंद्र सरकारान निश्चीत केलां. येवजणे खाला काम करपी एकूय व्यक्ती पगारा पसून वंचीत उरची न्हय, हे खातिरूच केंद्र सरकारान हो निर्णय घेतला. पूण ते खातीर कामगारांनी बँक खात्या कडेन आधार जोडणी करप गरजेचें आसा. येवजणे खाला काम करपी राज्यांतल्या सक्रीय कामगारां पैकीं 11.23 टक्के जाणांनी बँक खात्या कडेन आधार जोडणी केल्ली ना. ताका लागून ते ह्या सिस्टमा खातीर पात्र नाशिल्ल्याचें मंत्री पास्वान हांणी म्हणलां. ज्या कामागारांनी बँक खात्या कडेन आधार जोडणी केल्ली ना, तांचे मदीं जागृतायेचें काम सुरू केल्ल्याचेंय तांणी स्पश्ट केलें.
गांवगिऱ्या वाठारांतल्या नागरिकांनी आपल्या पंचायत वाठारांत काम मेळचें आनी तातूंतल्यान तांकां योग्य पगार मेळचो ह्या हेतान केंद्र सरकारान ‘मनरेगा’ येवजण सुरू केली. आतां मेरेन राज्यांतल्या 51,321 जाणांनी येवजणे खाला नोंदणी केल्या. पूण, तातूंतले फक्त 7,393 कामगारूच सक्रीय आशिल्ल्याचें जापेंतल्यान दिसून येता. येवजणे खाला काम करप्यांचो आंकडो वाडचो, हे खातीर ग्रामविकास खात्या कडल्यानूय फाटल्या कांय वर्सां सावन यत्न सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
