सुनीता विल्यम्स बुधवारा पावतली धर्तरेर

भांगरभूंय | प्रतिनिधी

वॉशिंगटन, खबरां संस्था: ‘ड्रॅगन’ या स्पेसएक्सच्या यानांतल्यान भारतीय वंशांची अमेरिकन अंतराळवीर सुनीता विल्यम्स आनी बुच विल्मोर हांचो धर्तरेर परतपाचो मार्ग आतां मेकळो जाला. भारतीय वेळा प्रमाण १८ मार्चाक सकाळीं १० जावन ३५ मिनटांनी हें यान आंतरराष्ट्रीय अंतराळ केंद्रा पसून वेगळें म्हळ्यार अनडॉक करतले.
ड्रॅगन ह्या अंतरीक्ष यानाचें अनडॉकींग जायत्या गजालींचेर निंबून आसा. हातूंत यान आनी रिकव्हरी टीमची तयारी, हवामान, दर्याची परिस्थिती आनी हेर जायत्या कारण थारपी घटकांचो आसपाव आसा. नासा आनी स्पेसएक्स हे क्रू-९ च्या परत येवपाच्या वेळारूच स्प्लॅशडावन स्थानाची सुवात निश्‍चीत करतले.
विल्यम्स आनी विल्मोर ह्या दोन अंतराळविरांनी ५ जून २०२४ दिसा परीक्षणयान आशिल्ल्या स्टारलायनरांतल्यान आंतरराष्ट्रीय अंतराळ स्टेशना कडेन गेल्लें. थंय आठ दीस घालयले उपरांत तीं परतपाचीं आशिल्लीं. मात तांच्या यानांत इबाड जाल्ल्यान हीं दोगांय थंयच आडकून उरलीं.

ड्रॅगनचे परतीचें वेळापत्रक
-१८ मार्चाक सकाळीं ०८.१५ वरांचेर हॅच क्लोज (यानाचें धाकण बंद करतले)
-१८ मार्चाक सकाळीं १०.३५ वरांचेर – अनडॉकींग (आयएसएस सावन वाहन वेगळें जातलें)
-१९ मार्च ०२.४१ वरांचेर डीऑर्बीट बर्न (धर्तरेच्या वातावरणांत यानाचो प्रवेश)
-१९ मार्च सकाळीं ०३.२७ वरांचेर स्प्लॅशडावन (यान दर्यांत देंवतलें)
-१९ मार्च सकाळीं ०५.०० वरांचेर – धर्तरेचेर परत येवपा विशीं पत्रकार परिशद जातली

चड दीस अंतराळ रावपी तिसरी बायल
१९ मार्च दिसा सुनीता विल्यम्स परततली. ते प्रमाण, सुनीता विल्यम्स हांणी वट्ट २८६ दीस अंतराळांत सारल्यात. ह्या दौर्‍या सयत अंतळाराच्या एकाच प्रवासांत आंतरराष्ट्रीय स्पेस स्टेशनांत सगल्यांत चड दीस रावपी विल्यम्स ही तिसरी बायल जावन आसा.